පටු දේශපාලන මතිමතාන්තරවලට හෝ වෙනත් විවිධ කාරණා ඔස්සේ බෙදි වෙන් වී නොසිට රට සහ රටේ ජනතාව මුහුණපා ඇති ආර්ථික ගැටලුව ඇතුළු අනෙකුත් ගැටලුවලට කඩිනම් විසඳුම් ලඟාකර ගත හැකි සැබෑ සර්ව පාක්ෂික රජයක් බිහිකර ගැනීමට කැපවීම මේ මොහොතේ සියලු දේශපාලන පක්ෂ සහ සංවිධානවල වගකීම බව පාර්ලිමේන්තු මන්ත්රී ජානක වක්කුඹුර මහතා පවසයි.
ඒ මහතා මේ බව ප්රකාශ කළේ ශ්රි ලංකා පොදුජන පෙරමුණ පක්ෂ මූලස්ථානයේ අද (10) පැවති ප්රවෘත්ති සාකච්ඡාවට එක්වෙමිනි.
එහිදි පාර්ලිමේන්තු මන්ත්රී ජානක වක්කුඹුර මහතා, “ මේ වන විට අලුත් කතිකාවතක් තිබෙනවා සර්ව පාක්ෂික ආණ්ඩුවක් හදන්න කියලා. ඒ සඳහා මහනායක හාමුදුරුවන් සහ විවිධ සංවිධාන ඉල්ලීමක් කළා. එයට වර්තමාන ජනාධිපතිතුමා සියලුම දේශපාලන පක්ෂවලට ආරාධනා කළා මේ කටයුත්තට එකතුවෙන්න කියලා. මේ වන විට යම් යම් පිරිස් එකතුවෙන්නත් කැමති සහ හැබැයි තමන්ගේ තනතුරුත් රැකගනිමින් විපක්ෂයේ කාර්යභාර්යය කරන්නත් බලාපොරොත්තුවෙන්න තමයි සර්ව පාක්ෂික ආණ්ඩුවකට එකඟතාවය පල කරන්නේ. ආණ්ඩුව සර්ව පාක්ෂික නම් සියලුදෙනාම වගකීම ගන්න ඕන. එනිසා මේ කාර්යයට සත්භාවයකින් පැමිණ, රටේ ජනතාවගේ ප්රශ්න විසඳන්න කෙටිකාලයකට සර්ව පාක්ෂික ආණ්ඩුවක් හදන්න. ඒ සර්ව පාක්ෂික ආණ්ඩුවට අපි ඔක්කෝම එකතුවෙලා වැඩකොටසක් සිදු කරන්න ඕන. අපි එයට ජනාධිපතිතුමාටත්, අගමැතිතුමාටත් සම්පූර්ණ සහයෝගය ලබා දෙන්න මේ වන විටත් පියවර අරගෙන තිබෙනවා.
දැන් තෙල් පෝලිම් ටික අඩුවෙලා තිබෙනවා. දෙන ප්රමාණයේ පමණයි ප්රශ්නයක් තිබෙන්නේ. ගෑස් ප්රශ්නය විසඳිලා තිබෙනවා. පොහොර ප්රශ්නය විසඳිලා තිබෙනවා. දැන් අපි හිටපු තැනට වඩා යමිකිසි තැනකට ඇවිත් තිබෙනවා.
නමුත් දැන් ලයිට් බිල වැඩි වෙනවා. මම මේ සඳහා පෞද්ගලිකව විරුද්ධයි.මම හිතන්නේ ජනාධිපතිතුමා, අගමැතිතුමා සහ කැබිනට් එකත් කවුරුත් මේ සඳහා කැමති නෑ. නමුත් කරන්න දෙයක් නොමැති නිසා මෙය සිදු කරන්නේ. නමුත් අපි බලාපොරොත්තු වෙන්න ඕන ජනතාවට තවත් මිල වැඩි කරන්න නොව මිල අඩු කරන්නයි. මම කියන්නේ මේ ආනයනය කරන භාණ්ඩවලට කිසියම් ක්රමවේදයක් හදන්න ඕන. ඒ සඳහා මිල සුත්රයක් හැදීමෙන් මීටත් වඩා ජනතාවට යම්කිසි සහනයක් ලබා දෙන්න පුළුවන් වෙයි. ජනතාව බලාපොරොත්තු වෙච්චි දේවල් වලින් හිටපු ජනාධිපතිතුමා රට වෙනුවෙන් විශාල වැඩකොටසක් කළා. එතුමා කරපු හොඳ වැඩ රාශියක් තිබෙනවා. උපාධිධාරි 60,000 කට එක අවුරුද්දකදි රැකියා ලබා දුන්නා. රාජ්ය සේවයට යන්න බැරිව සිටි දරුවන් 34,000 කට රැකියා ලබා දුන්නා. එතුමා තරුණයින් පිළිබඳව හිතලා ඒ තරුණයින් වෙනුවෙන් එය සිදු කළේ. හැබැයි සියල්ලම නරක විදිහටයි දැක්කේ. හිටපු ජනාධිපතිතුමාත්, අගමැතිතුමාත් රට වෙනුවෙන් විශාල වැඩකොටසක් සිදු කරලා තිබෙනවා. ගොඩක් අයට එය අමතකයි. නමුත් අනාගතයේදි එතුමාගේ වැඩ හොඳයි කියලා තේරුම් යයි . අපි බලාපොරොත්තු වෙනවා වර්තමාන ජනාධිපතිතුමාට මේ රටේ ප්රශ්න විසඳන්න අපි දෙන්න පුළුවන් සහය ලබා දෙන්න. අපි සියලුදෙනාට ආරාධනා කරනවා පක්ෂ පාඨ අමතක කරලා සියලු දෙනාම එකතුවෙලා සර්ව පාක්ෂික ආණ්ඩුවක් හදලා ඒ ආණ්ඩුවෙන් ජනතාවට සහන ලබා දෙන්න එකතුවෙලා කටයුතු කරමු කියලා. රාජ්ය සේවයට බදවා ගත්තාම ඒ පිරිසට නිශ්චිත කාර්යයක් පවරලා වැඩක් සිදු කරන්න ඕන. මේ සඳහා කළමණාකරණය තිබිය යුතුයි. දැන් මාස 03 ක් තිස්සේ සිට රාජ්ය සේවයේ වැඩක් සිදු කෙරෙන්නේ නෑ. මේ අරගල කාලය තුළ කිසිදු වැඩක් සිදු වුනේ නෑ. ජනාධිපතිතුමාට අපි කියා සිටියේ මෙ රාජ්ය සේවකයෝ සියලු දෙනා එකතු කරලා මේ යාන්ත්රණය ක්රමවත්ව ක්රියාත්මක කරන්න . මේ රට දියුණු කරන්න නම් අපි සැවොම වැඩ කරන්න ඕන. කෘෂිකාර්මික රටක් නිසා මේ සඳහා වැඩි බරක් දිලා කටයුතු කළා නම් අනාගතයේ උපදින දරුවන්ට ණයබරින් නිදහස් වෙන්න පුළුවන්. ” යැයි මන්ත්රී ජානක වක්කුඹුර මහතා වැඩිදුරටත් කියා සිටියේය.
