කොළඹ, මහනුවර සහ ගාල්ල ජාතික රෝහල්වල අධ්යක්ෂ තනතුරු ඇතුළුව සෞඛ්ය අමාත්යාංශයේ වසර 7-8ක් වැනි දීර්ඝ කාලයක් පුරප්පාඩුව පැවති නියෝජ්ය අධ්යක්ෂ ජනරාල් තනතුරු 9ක් සඳහා නව නිලධාරීන් පත් කිරීම සෞඛ්ය ක්ෂේත්රයේ විශාල හැරවුම්ලක්ෂයක් බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා ප්රකාශ කරයි. මෙම නව පත්වීම් ලැබූ නිලධාරීන් සඳහා පත්වීම් ලිපි ප්රදානය කිරීම අද (11) පෙරවරුවේ සෞඛ්ය අමාත්යාංශයේදී සිදු කෙරිණි.
මෙහිදී අදහස් දැක්වූ අමාත්යවරයා සඳහන් කළේ, පසුගිය කාලය පුරා පරිපාලන ව්යුහයේ තිබූ අඩුපාඩු පිළිසකර කර වැඩ කිරීම සඳහා මනා පදනමක් මේ වන විට සකස් කර ඇති බවයි. රාජකාරී කටයුතුවලදී කිසිදු දේශපාලන බලපෑමක් සිදු නොකරන බවත්, නිලධාරීන්ට ස්වාධීනව වැඩ කිරීමේ පරිසරය තහවුරු කර ඇති බවත් ඔහු අවධාරණය කළේය. නියෝජ්ය අධ්යක්ෂ ජනරාල්වරුන් යනු සෞඛ්ය අමාත්යාංශයේ කොඳුනාරටිය බඳු යැයි මෙහිදී අදහස් දැක්වූ අමාත්යාංශ ලේකම් විශේෂඥ වෛද්ය අනිල් ජාසිංහ මහතා ප්රකාශ කළේය.
ඒ අනුව හෙට (12) සිට ක්රියාත්මක වන පරිදි ශ්රී ලංකා ජාතික රෝහලේ නියෝජ්ය අධ්යක්ෂ ජනරාල් ලෙස විශේෂඥ වෛද්ය එම්.කේ.එස්. ඉන්දික කුමාර මහතා ද, නියෝජ්ය අධ්යක්ෂ ජනරාල් (වෛද්ය සේවා) I ලෙස විශේෂඥ වෛද්ය පී.ඩී.එස්. කිරිවන්දෙනිය මහත්මිය ද, නියෝජ්ය අධ්යක්ෂ ජනරාල් (දන්ත සේවා) ලෙස විශේෂඥ වෛද්ය චන්දන ගජනායක මහතා ද පත් කර තිබේ.
මීට අමතරව නියෝජ්ය අධ්යක්ෂ ජනරාල් (අධ්යාපන, පුහුණු හා පර්යේෂණ) ලෙස විශේෂඥ වෛද්ය කේ.ඩී.පී. විජේසිංහ මහතා, නියෝජ්ය අධ්යක්ෂ ජනරාල් (මහජන සෞඛ්ය) II ලෙස විශේෂඥ වෛද්ය කේ.ඒ.ඩී.ඩී.වී.එල්. කුමාරපේලි මහත්මිය, ගාල්ල ජාතික රෝහලේ නියෝජ්ය අධ්යක්ෂ ජනරාල් ලෙස විශේෂඥ වෛද්ය ප්රියන්ත අතපත්තු මහතා, නියෝජ්ය අධ්යක්ෂ ජනරාල් (වෛද්ය සැපයීම්) ලෙස විශේෂඥ වෛද්ය එස්.පී.ඒ.එල්. රණවීර මහතා, මහනුවර ජාතික රෝහලේ නියෝජ්ය අධ්යක්ෂ ජනරාල් ලෙස විශේෂඥ වෛද්ය එම්.එන්. වීරසූරිය මහතා සහ නියෝජ්ය අධ්යක්ෂ ජනරාල් (රසායනාගාර සේවා) ලෙස විශේෂඥ වෛද්ය එච්.එම්.ඒ. තිලකරත්න මහතා පත් කර ඇත.
