1983 කළු ජූලිය, 1988-89 භීෂණ සමය සහ 2022 වසරේ පැවති අරගලය වැනි ඓතිහාසික සිදුවීම් හේතුවෙන් මෙරට ආර්ථිකය සහ සමාජය ප්රබල ලෙස කඩා වැටුණු බව ශ්රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්රී නාමල් රාජපක්ෂ මහතා ප්රකාශ කරයි. කාල්ටන් නිවසේ අලුත් අවුරුදු චාරිත්ර ඉටු කිරීමෙන් අනතුරුව මාධ්ය වෙත අදහස් දක්වමින් ඔහු මේ බව සඳහන් කළේය.
අතීතයේ සිදුවූ වැරදි සහ අතපසුවීම් හඳුනාගෙන ඒවා නිවැරදි කරගනිමින් ඉදිරියට යාම ජාතියක වගකීම බව මන්ත්රීවරයා මෙහිදී අවධාරණය කළේය. විශේෂයෙන්ම තරුණ පරම්පරාව කෙරෙහි පවතින විශ්වාසය බිඳවැටීමට මෙවැනි ඇතැම් හුදකලා සිදුවීම් බලපා ඇති නමුත්, රටේ අභිවෘද්ධිය වෙනුවෙන් දක්ෂ හා නූතනවාදී තරුණ පිරිසක් සිටින බවත් ඔවුන් ප්රායෝගිකව රට ගොඩනැගීමට දායක කරගත යුතු බවත් ඔහු පැවසීය.
අභියෝගාත්මක වසරක් වුවද, අපේ සංස්කෘතික පදනම ආරක්ෂා කරගනිමින් අනාගත පරම්පරාව වෙනුවෙන් ශක්තිමත් අඩිතාලමක් දැමීමට මෙම අලුත් අවුරුද්දේ සියලු දෙනා ඒකරාශී විය යුතු බවද නාමල් රාජපක්ෂ මහතා වැඩිදුරටත් කියා සිටියේය.
