රජය විසින් ඉන්ධන මිල තීරණය කරනු ලබන සම්පූර්ණ මිල සූත්රය සහ ඉන්ධන සඳහා සහනාගාර ලබා දෙන්නේ නම් එහි සම්පූර්ණ විස්තරය ප්රසිද්ධ කරන ලෙස ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මහතා රජයට අභියෝග කරයි.
කොළඹ පැවති ජන හමුවකට එක්වෙමින් ඒ මහතා ප්රශ්න කර සිටියේ, ලෝක වෙළඳපොලේ බොරතෙල් මිල පහළ යන පසුබිමක අනෙකුත් කලාපීය රටවල් ඉන්ධන මිල අඩු කරන විට, ශ්රී ලංකාවේ මිල ඉහළ යන්නේ කෙසේද යන්නයි. රජය තම අකාර්යක්ෂමතාව සහ වැරදි කළමනාකරණය ජනතාව පිට පටවමින් සිටින බවට ද ඔහු චෝදනා කළේය.
ආනයන පිරිවැය, බදු, ප්රවාහන ගාස්තු සහ ලාභ ආන්තික ඇතුළු ඉන්ධන මිල තීරණය කිරීමට බලපාන සියලු සාධක හෙළි කරන ලෙස නාමල් රාජපක්ෂ මහතා මෙහිදී බලධාරීන්ට අභියෝග කළේය.
මීට අමතරව, තරුණ විරැකියාව, ජීවන වියදම ඉහළ යාම සහ ව්යාපාරික ක්ෂේත්රයේ පවතින ගැටලු ආමන්ත්රණය කිරීමට රජය අසමත් වී ඇති බව පෙන්වා දුන් ඒ මහතා, උපාධිධාරීන්ගේ සහ ත්රිරෝද රථ රියදුරන්ගේ විරෝධතාවලට රජය ප්රතිචාර දක්වන්නේ විසඳුම් ලබා දීමෙන් නොව මර්දනයෙන් බවට ද චෝදනා කළේය.
දැනට රට පුරා වේගයෙන් පැතිර යන ඩෙංගු වසංගතය පාලනය කිරීමට රජය නිසි පියවර ගෙන නොමැති බවත්, කසළ කළමනාකරණය සහ මදුරු මර්දන වැඩසටහන් ශක්තිමත් කරන ලෙසත් ඒ මහතා ප්රාදේශීය සභා වෙත දැනුම් දුන්නේය. තවද, ගොවීන්ට පොහොර සහනාධාර සහ ධීවරයින්ට ඉන්ධන සහන ලබා දීම තුළින් දේශීය නිෂ්පාදනය නංවාලීමෙන් ආහාර වියදම පාලනය කර ගත හැකි බව ද නාමල් රාජපක්ෂ මහතා වැඩිදුරටත් අවධාරණය කළේය.
