තමන් සතුව ඇතැයි පසුගිය කාලය පුරාම විවිධ දේශපාලන වේදිකාවල සහ සමාජ මාධ්යවල දැඩි කතාබහට ලක්වූ ලැම්බෝගිනි රථ 18න් එකක් හෝ සොයාගෙන විත් තමන්ට ලබා දෙන්නේ නම්, එය පදින්නට තමන් ඉතා කැමැත්තෙන් පසුවන බව පාර්ලිමේන්තු මන්ත්රී නාමල් රාජපක්ෂ මහතා ප්රකාශ කළේය. වැඩසටහනකට සහභාගී වීමෙන් පසු මාධ්ය අමතමින් මන්ත්රීවරයා කියා සිටියේ, එම වාහන පිළිබඳව චෝදනා නගන පුද්ගලයන්ට ඒවා තිබෙන තැනක් පෙන්විය හැකිනම් හෝ ගුවන් යානා මඟින් මෙරටට ගෙන ආවේ යැයි කියන කතාවල සත්යතාවක් ඇත්නම් ඉන් එකක් හෝ පදින්නට තමන් බලාපොරොත්තු වන නමුත් තවමත් කිසිවෙකුටත් එම වාහන සොයා ගැනීමට නොහැකි වී ඇති බවයි.
මෙහිදී ආණ්ඩුවේ ‘ක්ලීන් ශ්රී ලංකා’ වැඩපිළිවෙළ ද විවේචනය කළ මන්ත්රීවරයා, රට පිරිසිදු කිරීම කෙසේ වෙතත් මුදල් අමාත්යාංශය, මහ බැංකුව සහ වරායෙන් කන්ටේනර් 323ක් පන්නා වරාය ‘ක්ලීන්’ කර ඇති බවට චෝදනා කළේය. එසේම පිටරටින් හාල් ගෙන්වා ගොවියා ද, අසීමිත බදු ගසා ව්යාපාරිකයා ද ආණ්ඩුව විසින් ක්ලීන් කරමින් සිටින බව ඔහු පැවසීය. පාර්ලිමේන්තුවේ විපක්ෂයට කතා කිරීමේ අයිතිය අහිමි කරමින් ආණ්ඩුව අත්තනෝමතික ඒකාධිපති පාලනයකට යමින් සිටින බවත්, ගොවීන්ට සාධාරණ මිලකට පොහොර හෝ වී, තේ සහ එළවළු සඳහා සාධාරණ මිලක් ලබානොදී කෘෂිකර්මාන්තය මුළුමනින්ම කඩාකප්පල් කර ඇති බවත් මන්ත්රීවරයා වැඩිදුරටත් අවධාරණය කළේය.
