ශ්රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්රාම වයස දීර්ඝ කිරීමට රජය දරන උත්සාහයට එරෙහිව ඒකාබද්ධ විරෝධතාවක් ගොඩනැගීම සඳහා පාර්ලිමේන්තුව නියෝජනය කරන සියලු පක්ෂ නායකයින්ගේ හදිසි රැස්වීමක් කැඳවන ලෙස ශ්රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්රී නාමල් රාජපක්ෂ මහතා විපක්ෂ නායක සජිත් ප්රේමදාස මහතා වෙත ලිපියක් යොමු කර තිබේ. ජූලි 07 වන දිනැතිව යොමු කර ඇති එම ලිපිය මගින් ඔහු අවධාරණය කර ඇත්තේ ආණ්ඩුක්රම ව්යවස්ථාව උල්ලංඝනය කරමින් විනිසුරුවරුන්ගේ ධුර්ම කාලය දීර්ඝ කිරීමට රජය ගෙන ඇති තීරණයට එරෙහිව ප්රජාතන්ත්රවාදය අගයන සියලු පක්ෂ එක්ව නැගී සිටිය යුතු බවයි.
කිසිදු පිළිගත හැකි සාධාරණ හේතුවකින් තොරව සිදුකරනු ලබන මෙම ව්යවස්ථා සංශෝධන සූදානම හේතුවෙන් රටේ නීතියේ ආධිපත්යය බිඳ වැටීමේ බරපතළ අවදානමක් මතුව ඇති බව මන්ත්රීවරයා සිය ලිපියෙන් පෙන්වා දෙයි. රජයේ මෙම ක්රියාමාර්ගය මගින් මව්බිමේ ප්රජාතන්ත්රවාදී ක්රියාදාමයට සහ අධිකරණයේ ස්වාධීනත්වයට දැඩි බලපෑමක් එල්ල වන බවද ඔහු එහි තවදුරටත් සඳහන් කරයි.
අධිකරණ සේවයේ ස්වාධීනත්වය සහ ආණ්ඩුක්රම ව්යවස්ථාවේ උත්තරීතරභාවය ආරක්ෂා කර ගැනීම උදෙසා විපක්ෂයේ දේශපාලන පක්ෂ නායකයින් අතර පුළුල් සංවාදයක් ඇති කර ගැනීම මෙම අවස්ථාවේ අත්යවශ්ය කරුණක් බව නාමල් රාජපක්ෂ මහතා වැඩිදුරටත් සිය ලිපිය මගින් පෙන්වා දී තිබේ. රජයේ මෙම හදිසි ව්යවස්ථා සංශෝධන සූදානමට එරෙහිව පොදු එකඟතාවක් ගොඩනැගීමේ අරමුණින් මෙම හදිසි සාකච්ඡාව කැඳවන ලෙස ඔහු ඉල්ලා ඇති අතර, විපක්ෂ නායකවරයාගේ ප්රතිචාරය මත ඉදිරි දේශපාලන පියවර තීරණය වනු ඇත.
