ජාතික අධ්යාපන ආයතනය (NIE) සතු කාර්යයන් වඩාත් වගකීමෙන්, විනිවිදභාවයකින් සහ කාර්යක්ෂමව ඉටු කිරීමේ අරමුණින් එහි නව විෂයමාලා සංවර්ධන මධ්යස්ථානය (Curriculum Development Centre) සහ තත්ත්ව සහතික කිරීමේ ඒකකය (Quality Assurance Unit) අද (02) විවෘත කෙරිණි. අධ්යාපන හා උසස් අධ්යාපන නියෝජ්ය අමාත්ය වෛද්ය මධුර සෙනෙවිරත්න මහතාගේ ප්රධානත්වයෙන් මෙම සමාරම්භක උත්සවය පැවැත්විණි.
මෙම මධ්යස්ථාන ද්විත්වය හරහා සිදුවන ප්රධාන කාර්යභාරයන් පහත පරිදි වේ.
නව විෂයමාලා සංවර්ධන මධ්යස්ථානය ඔස්සේ පාසල් විෂයමාලා සංවර්ධන කටයුතු වඩාත් නිරවද්ය සහ විශ්වාසදායී අයුරින් සිදු කිරීමට නියමිතය. විෂයමාලා සංවර්ධනය සඳහා සම්මත මෙහෙයුම් පටිපාටියක් (SOP) හඳුන්වා දී ඇති අතර, ඒවා ශාස්ත්රීය, විද්යාත්මක හා තාක්ෂණික වශයෙන් ඇගයීමට ලක් කෙරේ. මීට සමගාමීව විවෘත කළ තත්ත්ව සහතික කිරීමේ ඒකකය මගින් ජාතික අධ්යාපන ආයතනයේ සමස්ත කටයුතු සහ පරිපාලන ව්යුහය ඇගයීමට ලක් කරමින් ආයතනික ගුණාත්මකභාවය ඉහළ නැංවීමට කටයුතු කරනු ඇත.
උත්සවයේදී අදහස් දැක්වූ නියෝජ්ය අමාත්යවරයා සඳහන් කළේ, පූර්ව ළමාවිය, සාමාන්ය, වෘත්තීය සහ උසස් අධ්යාපන යන ක්ෂේත්රවල මූලික ප්රතිපත්ති සැකසීමේ අවසන් අදියරේ පවතින බවයි. අධ්යාපනයේ ගුණාත්මකභාවය ඉහළ නැංවීමට අවශ්ය මානව ප්රාග්ධනය පිළිබඳ දත්ත මේ වන විට සකස් වෙමින් පවතින බව ද ඔහු පැවසීය.
ජාතික අධ්යාපන ආයතනයේ අධ්යක්ෂ ජනරාල් ජ්යෙෂ්ඨ මහාචාර්ය ඕ. ජී. දයාරත්න මහතා ප්රකාශ කළේ, 2027 වසරේදී හය ශ්රේණිය සඳහා ක්රියාත්මක කිරීමට නියමිත නව අධ්යාපන ප්රතිසංස්කරණ සඳහා අවශ්ය මොඩියුල සහ ගුරු අත්පොත් නියමිත වේලාවට ලබාදීමට ආයතනය සූදානම් බවයි. මෙම අවස්ථාව සඳහා ජාතික අධ්යාපන ආයතනයේ උසස් නිලධාරීන් සහ අධ්යයන හා අනධ්යයන කාර්ය මණ්ඩලය එක්ව සිටියහ.
