මීගමුව ප්රාදේශීය ලේකම් කාර්යාලය දැනට පවත්වාගෙන යනු ලබන පැරණි සහ අනාරක්ෂිත ගොඩනැගිලි සංකීර්ණය වෙනුවට නව ගොඩනැගිල්ලක් ඉදිකිරීම සඳහා අමාත්ය මණ්ඩල අනුමැතිය හිමිව තිබේ.
දැනට මීගමුව ප්රාදේශීය ලේකම් කාර්යාලය වසර 50ක් පැරණි ගොඩනැගිලි දෙකක පවත්වාගෙන යනු ලබන අතර, නිලධාරීන් 127 දෙනෙකු සේවය කරන මෙම ස්ථානයට දිනකට සේවාලාභීන් 1,500කට අධික පිරිසක් පැමිණෙති. කාර්යාලීය ඉඩකඩ ප්රමාණවත් නොවීම මෙන්ම පවතින ගොඩනැගිලිවල ඉරිතැලීම්, ජල කාන්දු වීම් සහ ගිලා බැසීම් වැනි සංකූලතා හේතුවෙන් සේවකයින් සහ සේවාලාභීන් දැඩි අපහසුතාවකට පත්ව සිටිති.
මෙම ගැටලුවට විසඳුමක් ලෙස, උඩයාතොප්පුව ග්රාම නිලධාරි කොට්ඨාසයේ දැනට ප්රාදේශීය ලේකම් නිල නිවාසය පිහිටි අක්කරයකට ආසන්න ඉඩමක මෙම නව කාර්යාලය ඉදිකිරීමට නියමිතය. රුපියල් මිලියන 398.60ක ඇස්තමේන්තුගත පිරිවැයකින් ඉදිකෙරෙන මෙම නව ගොඩනැගිල්ල මහල් හතරකින් සමන්විත වේ.
රාජ්ය පරිපාලන, පළාත් සභා සහ පළාත් පාලන අමාත්යවරයා විසින් ඉදිරිපත් කළ මෙම යෝජනාවට අමාත්ය මණ්ඩලය සිය අනුමැතිය ලබා දී ඇත.
