මීගමුව බන්ධනාගාරය තුළ ඇති වූ දරුණු ප්රචණ්ඩකාරී ගැටුමෙන් මියගිය සංඛ්යාව 27 දක්වා ඉහළ ගොස් ඇති අතර, එහි අභ්යන්තරයේ සිදුවූ අතිශය භීතිකාජනක තොරතුරු රැසක් ආරක්ෂක අංශ විසින් අනාවරණ කරගෙන තිබේ. මත්ද්රව්ය ජාවාරමක් පාවාදීමේ ඔත්තුකරුවන් ඉලක්ක කර ගනිමින් ‘කටුවැල්ලේගම සුරේෂ්’ නමැත්තාගේ මෙහෙයවීමෙන් ඉරිදා පෙරවරුවේ මෙම ගැටුම ආරම්භ වී ඇත. රැඳවියන් බන්ධනාගාර රෝහල කඩා මානසික රෝගීන් සඳහා ලබාදෙන ඖෂධ පැහැරගෙන ගොස් ඇති අතර, පසුව ඇතිවූ නොසන්සුන්තාව පාලනය කිරීමට පැමිණි බන්ධනාගාර ක්ෂණික ප්රහාරක බලකායේ නිලධාරීන් වටකර අමානුෂික ලෙස පහරදී තිබේ. එහිදී ඇතැම් නිලධාරීන්ගේ හිසට උඩින් විශාල ගල් අතහැර ඇති බවද බන්ධනාගාර ආරංචි මාර්ග පවසයි.
කලහකාරී රැඳවියන් බන්ධනාගාරයේ ආරක්ෂිත කුටිය බිඳ එහි තිබූ T-56 සහ රීපීටර් (Repeater) වර්ගයේ ගිනිඅවි දෙකක් පැහැරගෙන නිලධාරීන්ට වෙඩි තබා ඇති බවටද තොරතුරු අනාවරණය වේ. ගැටුමෙන් බන්ධනාගාර විශේෂ උපක්රමික ඒකකයේ නිලධාරීන් 7 දෙනෙකු සහ රැඳවියන් 20 දෙනෙකු ජීවිතක්ෂයට පත්ව ඇත. තත්ත්වය පාලනය කිරීමෙන් පසු මීගමුව බන්ධනාගාරයේ සිටි රැඳවියන් 1,033 දෙනෙකු ආරක්ෂාව සඳහා බූස්ස, මහර, අනුරාධපුරය ඇතුළු වෙනත් බන්ධනාගාර වෙත මාරු කර යවා ඇති අතර, ප්රධාන සැකකරු වන කටුවැල්ලේගම සුරේෂ් බූස්ස අධිආරක්ෂිත බන්ධනාගාරය වෙත යොමුකර තිබේ. මේ වන විට සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව (CID) සහ මානව හිමිකම් කොමිසම පුළුල් විමර්ශන ආරම්භ කර ඇත.
