මීගමුව බන්ධනාගාරය තුළ පසුගිය ජූලි 5 සහ 6 යන දිනවල සිදු වූ දරුණු ප්රචණ්ඩකාරී ගැටුම සම්බන්ධයෙන් පූර්ණ හා විධිමත් විමර්ශනයක් පවත්වා වාර්තා කිරීම සඳහා ජනාධිපති ලේකම් ආචාර්ය නන්දික සනත් කුමානායක මහතා විසින් විශේෂ පරීක්ෂණ කමිටුවක් (Committee of Inquiry) පත් කර තිබේ. අමාත්ය මණ්ඩල (Cabinet) අනුමැතියට යටත්ව මෙම කමිටුව පත් කර ඇති බව වාර්තා වේ. මෙම ත්රිපුද්ගල පරීක්ෂණ කමිටුවේ සභාපතිවරයා ලෙස විශ්රාමික ශ්රේෂ්ඨාධිකරණ විනිසුරු ප්රියන්ත ප්රනාන්දු මහතා පත් කර ඇති අතර, එහි සෙසු සාමාජිකයන් ලෙස අතිරේක සොලිසිටර් ජනරාල්, ජනාධිපති නීතිඥ මිලින්ද ගුණතිලක සහ ජනාධිපති නීතිඥ මෝහන් වීරකෝන් යන මහත්වරුන් කටයුතු කරති. මීට අමතරව ජනාධිපති ජ්යෙෂ්ඨ සහකාර ලේකම් කේ.එල්.ඩී. අසේල මහතා මෙම කමිටුවේ ලේකම්/කැඳවුම්කරු ලෙස පත් කර ඇත. බන්ධනාගාරය තුළ නිලධාරීන් 7 දෙනෙකු ඇතුළු 27 දෙනෙකුට ජීවිත අහිමි කරමින් මත්ද්රව්ය ජාවාරම්කරුවන් පිරිසක් විසින් ඇති කළ මෙම මහා ඛේදවාචකයට බලපෑ ආසන්නතම හේතු සහ පසුබිම සෙවීම මෙම කමිටුවට පැවරී ඇති ප්රධාන වගකීමයි.
