රජයේ පාසල්වල පළමු වැනි ශ්රේණියට (Grade 1) සිසුන් ඇතුළත් කිරීමේදී පවතින පදිංචිය තහවුරු කරගැනීමේ ගැටලුවලට සහ වංචාවලට තිත තබමින් 2027 අධ්යයන වර්ෂයේ සිට ක්රියාත්මක වන පරිදි නව ව්යූහගත වටිනාකම් ඇතුළත් චක්රලේඛයක් නිකුත් කර ඇති බව අගමැතිනි හරිනි අමරසූරිය මෙණෙවිය ඊයේ (08) පාර්ලිමේන්තුවේදී ප්රකාශ කළාය. පාර්ලිමේන්තු මන්ත්රීනි නිලුෂා ලක්මාලි ගමගේ මහත්මිය යොමුකළ ප්රශ්නයකට පිළිතුරු දෙමින් ඇය මේ බව සඳහන් කළාය.
නව ක්රමවේදය යටතේ, වසර 8කට වඩා වැඩි කාලයක් රජයේ ඉඩමක පදිංචිව සිටින පිරිස් මෙන්ම, වසර 1 සිට 6 දක්වා කාලය තුළ ස්ථිර පදිංචිය සනාථ කරන විදුලි, ජල හෝ වරිපනම් බිල්පත් ඉදිරිපත් කරන අයදුම්කරුවන්ට උපරිම ලකුණු 04ක් දක්වා හිමි වේ. එමෙන්ම, ඇතැම් පාසල්වල පොරොත්තු ලේඛනවලින් (Waitlist) පිටතින් සිසුන් ඇතුළත් කරගන්නා බවට ලැබුණු පැමිණිලි සැලකිල්ලට ගනිමින්, පවතින පුරප්පාඩු සංඛ්යාවෙන් 50%ක සීමාවක තාවකාලික පොරොත්තු ලේඛන සකස් කිරීමට ද නව චක්රලේඛයෙන් නියෝග කර ඇත. පන්තියක සිටිය යුතු උපරිම ශිෂ්ය සංඛ්යාව පිළිබඳව ද මේ වන විට ප්රතිපත්තිමය සමාලෝචනයක් සිදුවෙමින් පවතී.
ළමා ආරක්ෂණය වෙනුවෙන් රජය ගෙන ඇති පියවර රැසක් ද අගමැතිනිය මෙහිදී අනාවරණය කළාය. ඒ අනුව, මව්පියන් අහිමි දරුවන්ට නිවාස ඉදිකිරීමට රුපියල් මිලියන 2 බැගින් සහ මාසිකව රුපියල් 5,000ක දීමනාවක් ලබාදීම, උප්පැන්න සහතික නොමැති දරුවන්ට ඒවා ලබාදීම, කායික දණ්ඩනය වැළැක්වීමේ නීති පාර්ලිමේන්තුගත කිරීම සහ ළමයින්ට උසාවි නොගොස් සාක්ෂි දිය හැකි වීඩියෝ මධ්යස්ථාන කරාපිටිය සහ අනුරාධපුර රෝහල්වල ස්ථාපනය කිරීම මේ වන විට අවසන් අදියරේ පවතින බව ඇය වැඩිදුරටත් සඳහන් කළාය.
