විදේශ විනිමය වෙළෙඳපොළ තුළ පැවති අවිනිශ්චිතතාවය සහ සමපේක්ෂණ චේතනාවන් (Speculation) හේතුවෙන් කෘතිමව වේගයෙන් ඉහළ ගිය ඩොලරයේ අගය එක රැයකින් ස්ථාවර මට්ටමකට පහළ හෙළීමට හැකි වූ ආකාරය ශ්රී ලංකා මහ බැංකු අධිපති ආචාර්ය නන්දලාල් වීරසිංහ මහතා අද (26) පැවති මාධ්ය හමුවකදී අනාවරණය කළේය.
මහ බැංකු අධිපතිවරයා පෙන්වා දෙන්නේ විදේශ විනිමය වෙළෙඳපොළ “අන්තර් බැංකු” (Inter-Bank) සහ බැංකුවලින් පිටත “බැංකු-ගනුදෙනුකරුවන්” ලෙස දෙයාකාරයකින් ක්රියාත්මක වන බවයි. පසුගිය දිනවල බැංකු අතර ඩොලරයේ අගය රුපියල් 330ක මට්ටමක පැවතියද, ආනයනකරුවන් කලබල වී ඕනෑම මිලකට ඩොලර් ලබාගැනීමට උත්සාහ කිරීම නිසා බැංකුවලින් පිටත ඩොලරයේ මිල 350, 360 සහ Forward ක්රමයට 370-400 දක්වා අසාධාරණ ලෙස ඉහළ ගොස් තිබුණි. මේ හේතුවෙන් ඉකුත් බ්රහස්පතින්දා (21) පියවරක් ගනිමින් අන්තර් බැංකු වෙළෙඳපොළ නිසි පරිදි සක්රීය (Activate) කළ බවත්, එමඟින් බැංකුවලින් පිටත කෙරෙන ගනුදෙනු ද අන්තර් බැංකු මට්ටමට ගැලපීම හරහා ඩොලරයේ මිල වේගයෙන් පහත වැටී ස්ථාවර වූ බවත් ඔහු පැහැදිලි කළේය.
මෙහිදී විශේෂ ප්රකාශයක් කළ අධිපතිවරයා, එම අවස්ථාවේ කලබල වී 350 හෝ 360 වැනි ඉහළ මිල ගණන්වලට ඩොලර් මිලදී ගත් වාහන ආනයනකරුවන් ඇතුළු ව්යාපාරිකයන්, එම පාඩුව පාරිභෝගිකයන් මත පැටවීම වැරදි බව අවධාරණය කළේය. පවතින සාමාන්ය විනිමය අනුපාතයට වඩා වැඩි මිලකට භාණ්ඩ විකිණීමට උත්සාහ කරන්නේ නම් ඊට රැවටිය යුතු නැති බවත්, ව්යාපාරිකයන් තමන් කලබල වී ගත් තීරණවල පාඩුව තමන් විසින්ම විඳගත යුතු බවත් මහ බැංකු අධිපතිවරයා වැඩිදුරටත් කියා සිටියේය.
