වර්ෂ 2022 පැවති ආර්ථික අර්බුදය වැනි තත්ත්වයක් රට තුළ යළි ඇතිවන බවට ඇතැමුන් මත පළ කළ ද, එවැන්නක් කිසිසේත් සිදුවීමට ඉඩ නොදෙන බව ජනාධිපති අනුර කුමාර දිසානායක මහතා අවධාරණය කරනවා. නින්දවූර් සංස්කෘතික මධ්යස්ථානයේ ඉදිකිරීම් යළි ආරම්භ කිරීමේ අවස්ථාවට සහභාගි වෙමින් ජනාධිපතිවරයා මේ බව ප්රකාශ කළා. මැදපෙරදිග පවතින යුදමය වාතාවරණය හේතුවෙන් ගෝලීය වශයෙන් ඇති වී තිබෙන බලපෑම් කළමනාකරණය කර ගැනීමේ ශක්තිය වත්මන් රජය සතු බවත් ඔහු වැඩිදුරටත් සඳහන් කළා.
2022 වසරේදී රට තුළ ඩොලර් සංචිත නොතිබුණ ද, වර්තමානයේ මහ බැංකුව සතුව ඩොලර් මිලියන 7,000කට ආසන්න සංචිතයක් පවතින බවත්, ඉදිරියේදී තවත් ඩොලර් මිලියන 700ක් ලැබීමට නියමිත බවත් ජනාධිපතිවරයා පැවසුවා. ඉන්ධන, ගෑස්, කිරිපිටි සහ පොහොර වැනි අත්යවශ්ය භාණ්ඩවල කිසිදු හිඟයක් ඇතිවීමට ඉඩ නොදෙන බවට ඔහු එහිදී සහතික වුණා. ආර්ථිකයට පීඩනයක් තිබුණ ද, රට ඇතුළේ ප්රශ්න මෙන්ම බාහිර අභියෝග ද ජය ගැනීමට රජය ක්රියාමාර්ග ගනිමින් සිටින බව ඔහු අවධාරණය කළා.
වසර 24කට පෙර එනම් 1999 වසරේ ආරම්භ කර, 2014 වසරේ සිට සම්පූර්ණයෙන්ම නතර වී තිබූ නින්දවූර් සංස්කෘතික මධ්යස්ථානයේ ඉදිකිරීම් කටයුතු යළි ආරම්භ කිරීම මෙම සංචාරයේ ප්රධාන අරමුණයි. මෙම ව්යාපෘතිය සඳහා සමස්ත ඇස්තමේන්තුව රුපියල් මිලියන 945.04ක් වන අතර 2026 අය-වැය යටතේ රුපියල් මිලියන 300ක් වෙන් කර තිබෙනවා. 2027 දෙසැම්බර් 31 දින වන විට සියලු ඉදිකිරීම් නිම කිරීම මෙහි ඉලක්කයයි. අම්පාර දිස්ත්රික්කයේ ජනතාවගේ දීර්ඝකාලීන ඉල්ලීමක් වූ මෙම ව්යාපෘතිය, ජාති හෝ ආගම් භේදයකින් තොරව ප්රජාවන් අතර සහයෝගීතාව වර්ධනය කිරීමේ මධ්යස්ථානයක් ලෙස මතු පරපුරට දායාද කිරීම රජයේ අරමුණයි.
