ශ්රී ලංකාවේ මහජන සෞඛ්ය ක්ෂේත්රයට සියවසක් පුරා සුවිශේෂී සේවාවක් ඉටු කළ කළුතර ජාතික සෞඛ්ය විද්යායතනයේ (NIHS) සියවස් සංවත්සරය නිමිත්තෙන් මහජනතාව දැනුවත් කිරීමේ සෞඛ්ය පාගමනක් ඊයේ (10) ඉතා උත්කර්ෂවත් අයුරින් පැවැත්විණි. සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ ප්රධානත්වයෙන් කළුතර නගරය කේන්ද්ර කරගනිමින් මෙම පාගමන ආරම්භ විය.
කළුතර මහ නගර සභා පරිශ්රයෙන් ඇරඹි මෙම පාගමන කිලෝමීටර් හතරක දුරක් ගමන් කර ජාතික සෞඛ්ය විද්යායතනය වෙත ළඟා වූ අතර, එහිදී මහජනතාවට රෝග නිවාරණ උපදෙස්, සෞඛ්ය ප්රවර්ධන පණිවිඩ සහ සෞඛ්ය සම්පන්න ජීවන රටාව පිළිබඳ දැනුවත් කිරීම් සිදු කරන ලදී.
සමාරම්භක උත්සවයේදී අදහස් දැක්වූ අමාත්යවරයා පෙන්වා දුන්නේ, කළුතර ජාතික සෞඛ්ය විද්යායතනය ශ්රී ලංකාවේ මහජන සෞඛ්ය හා ප්රාථමික සෞඛ්ය සේවාව ශක්තිමත් කළ ප්රධානතම පුහුණු ආයතනය බවයි. 1926 වසරේ ආරම්භ වූ මෙම ආයතනය, මහජන සෞඛ්ය පරීක්ෂකවරුන්, මහජන සෞඛ්ය හෙද නිලධාරීන් සහ පවුල් සෞඛ්ය සේවා නිලධාරිණියන් වැනි ප්රාථමික සෞඛ්ය සේවාවේ මානව සම්පත බිහිකරමින් ශ්රී ලංකාවට ජාත්යන්තර කීර්තියක් අත්කර දී ඇත.
මෙම පාගමන අතරතුර බෝ නොවන රෝග වළක්වා ගැනීම, ඩෙංගු පාලනය, මාතෘ හා ළමා සෞඛ්යය, මානසික සෞඛ්යය සහ මත්ද්රව්ය භාවිතයෙන් වැළකීම වැනි මාතෘකා ඔස්සේ මහජනතාව දැනුවත් කළ අතර, තවදුරටත් අධ්යාපනික වැඩසටහන් මෙම මස අගභාගයේදී පැවැත්වීමට නියමිතය.
