කොවිඩ්-19 වසංගත සමයේ පනවන ලද දැඩි සංචරණ සීමා සහ දේශසීමා වසා දැමීමෙන් පසු උතුරු කොරියාවේ මරණ දඬුවම් පැමිණවීම් සංඛ්යාව කැපී පෙනෙන ලෙස ඉහළ ගොස් ඇති බව දකුණු කොරියාව පදනම් කරගත් සිවිල් සංවිධානයක් පවසයි. විශේෂයෙන්ම විදේශීය සංස්කෘතීන් සහ ආගමික කටයුතුවලට අදාළ තහංචි උල්ලංඝනය කිරීම් මෙම මරණ දඬුවම් ඉහළ යාමට ප්රධානතම හේතුව වී ඇති බව ‘Transitional Justice Working Group’ ආයතනය නිකුත් කළ නවතම වාර්තාවක දැක්වේ.
සෝල් නුවර පදනම් කරගත් මෙම කණ්ඩායම විසින් 2020 සහ 2024 අතර කාලය තුළ මරණ දඬුවම් ක්රියාත්මක කළ අවස්ථා 60ක් වාර්තා කර ඇති අතර, එහිදී පුද්ගලයින් 148 දෙනෙකුට මරණ දඬුවම ලබා දී ඇත. මෙය ඊට පෙර වසර පහක කාලය තුළ වාර්තා වූ මරණ දඬුවම් 41ට සාපේක්ෂව විශාල ඉහළ යාමකි. දකුණු කොරියානු ටෙලි නාට්ය සහ චිත්රපට නැරඹීම වැනි විදේශීය සංස්කෘතික සීමා උල්ලංඝනය කිරීම් හේතුවෙන් මරණ දඬුවම ලබා දීම වසංගත සමයට පෙර පැවති මිනීමැරුම් චෝදනාවලට වඩා ඉහළ ගොස් තිබේ.
දේශපාලන වැරදි සම්බන්ධයෙන් මරණ දඬුවම ලබා දීම ද 4 සිට 28 දක්වා ඉහළ ගොස් ඇති අතර උතුරු කොරියානු නායක කිම් ජොන් උන් සිය පාලනයට එරෙහි වන විරුද්ධ මත මර්දනය කිරීමට මෙලෙස කටයුතු කර ඇති බව වාර්තාව පෙන්වා දෙයි. දකුණු කොරියාවේ වසන උතුරු කොරියානු සරණාගතයින් 880 දෙනෙකු සමඟ කළ සම්මුඛ සාකච්ඡා සහ චන්ද්රිකා ඡායාරූප විශ්ලේෂණය කිරීමෙන් මෙම තොරතුරු ලබාගෙන ඇති අතර මෙය එරට පවතින බරපතල මානව හිමිකම් කඩවීම් පිළිබඳව ලෝකයාට කෙරෙන අනතුරු ඇඟවීමක් ලෙස සැලකේ.
