නෝර්වුඩ් NC තේ වතුයාය සහ කෙසෙල්ගමුඔය ආශ්රිත ෆෝට්ට්රී වතුයායේ රාත්රී කාලයේ සිදුකරන නීති විරෝධී මැණික් ගැරීම හේතුවෙන් විශාල පරිසර හානියක් සිදුවී ඇති බව වතු කම්කරුවන් සහ වතු පාලන අධිකාරිය පවසයි. තේ පඳුරු ගලවා මැණික් ඉල්ලම් ලබාගැනීම නිසා වතුයායේ බිම් කොටස් වළවල්වලින් පිරී ගොස් ඇති අතර, එමගින් වතු කම්කරුවන්ට සිය දෛනික රාජකාරිවල නිරත වීමට නොහැකි තත්ත්වයක් උද්ගත වී තිබේ.
මෙම ජාවාරම්කරුවන් විසින් පොලිසියේ ක්රියාකාරකම් නිරීක්ෂණය කිරීමට මුරකරුවන් යොදවා ඇති අතර, සමහර පොලිස් නිලධාරීන්ගේ සහයෝගය ද මෙම ජාවාරම්කරුවන්ට ලැබෙන බවට චෝදනා එල්ල වේ.
මෙම සිද්ධිය සම්බන්ධයෙන් අදහස් දක්වමින් නෝර්වුඩ් පොලිස් ස්ථානාධිපති ප්රධාන පොලිස් පරීක්ෂක බණ්ඩාර රාජනායක මහතා පැවසුවේ, සැකකරුවන් අත්අඩංගුවට ගැනීමට දැඩි උත්සාහයක් දරන බවයි. වැඩිදුරටත් අදහස් දැක්වූ හැටන් කොට්ඨාශ භාර ජ්යෙෂ්ඨ පොලිස් අධිකාරි ප්රදීප් වීරසේකර මහතා, මෙම ජාවාරම මැඩපැවැත්වීම සඳහා කොට්ඨාශ දූෂණ මර්ධන ඒකකය යොදවන බවත්, මෙවැනි ක්රියාකාරකම් පිළිබඳ තොරතුරු වහාම තමන් වෙත ලබා දෙන ලෙස ප්රදේශවාසීන්ගෙන් ඉල්ලා සිටින බවත් සඳහන් කළේය.
