බාල ගල්අඟුරු ආනයනය කිරීම හේතුවෙන් සිදුවූ දැවැන්ත මූල්ය අලාභය පියවා ගැනීම සඳහා රජය විසින් විදුලි බිල සියයට 18කින් ඉහළ දමා ඇති බවට විපක්ෂ නායක සජිත් ප්රේමදාස මහතා බරපතල චෝදනාවක් කරයි. ඊයේ (10) විශේෂ ප්රකාශයක් නිකුත් කරමින් ඔහු කියා සිටියේ, මහජන උපයෝගිතා කොමිසම හරහා මහජන අදහස් විමසන අවස්ථාවේදී පවා සමගි ජන බලවේගය මෙම ජාවාරමේ බර ජනතාව මත පටවන්න එපා යැයි දැඩිව පවසා සිටි බවයි. කෙසේ වෙතත්, එම විරෝධතා නොතකා හරිමින් රජය සහ කොමිසම විසින් මෙම විදුලි බිල වැඩි කිරීමේ යෝජනාව ක්රියාත්මක කර ඇත.
මෙම විදුලි බිල වැඩි කිරීම ප්රධාන වශයෙන් බලපාන්නේ ඒකක 180ට වඩා වැඩියෙන් විදුලිය භාවිත කරන ඉහළ මධ්යම පන්තිය, ව්යාපාරිකයන්, කර්මාන්තකරුවන් සහ ව්යවසායකයන්ට බව විපක්ෂ නායකවරයා පෙන්වා දෙයි. මෙය බාල ගල්අඟුරු ජාවාරමේ පාඩුව පියවා ගැනීම සඳහා රජය විසින් ව්යාපාරිකයන්ගෙන් සහ ව්යවසායකයන්ගෙන් ලබා ගන්නා ‘කප්පමක්’ ලෙස ඔහු හැඳින්වීය. බාල ගල්අඟුරු වංචාවේ නියම වන්දිය ගෙවීමට සිදු වී ඇත්තේ රටේ නිෂ්පාදනයට දායක වන ජනතාවට බව ඔහු අවධාරණය කළේය.
මුලදී මෙම ගල්අඟුරු බාල නොවන බවට රජය ප්රකාශ කළද, පසුව එය බාල බව පිළිගෙන වංචාවක් සිදුවී නැති බවට රජය කියා සිටි බව සජිත් ප්රේමදාස මහතා සිහිපත් කළේය. බාල ගල්අඟුරු භාවිතය නිසා විදුලි නිෂ්පාදනය අඩු වීමත්, ඒ හේතුවෙන් අධික පිරිවැයක් දරමින් ඉන්ධන බලාගාර ක්රියාත්මක කිරීමට සිදු වීමත් නිසා විදුලි උත්පාදන පිරිවැය ඉහළ ගිය බව ඔහු පැහැදිලි කළේය. අවසානයේදී, මෙම සියලු පිරිවැය වැඩි වීම්වල බර උසුලන්නට සිදු වී ඇත්තේ රටේ වැදගත් නිෂ්පාදන ක්ෂේත්ර නියෝජනය කරන පිරිසට බවත්, තුනෙන් දෙකක බලයක් සහිත රජයක් පත් කර ගත්තේ මෙවැනි ආකාරයෙන් කටයුතු කිරීමට නොවන බවත් විපක්ෂ නායකවරයා වැඩිදුරටත් පැවසීය.
