වර්තමානයේ සම්බුද්ධ ශාසනයට සහ ආගම දහමට විවිධ පැතිකඩවලින් අභියෝග එල්ල වෙමින් පවතින බැවින්, එම අභියෝග හමුවේ නිහඬව නොසිට ප්රායෝගිකව ශක්තිමත්ව නැගී සිටීම සියලු දෙනාගේ වගකීමක් බව විපක්ෂ නායක සජිත් ප්රේමදාස මහතා අවධාරණය කරයි. කොළඹ බණ්ඩාරනායක ජාත්යන්තර සම්මන්ත්රණ ශාලාවේදී පැවැති උත්සවයක් අමතමින් ඒ මහතා කියා සිටියේ ආණ්ඩුක්රම ව්යවස්ථාවෙන් බුදුදහමට ලබා දී ඇති උත්තරීතර ස්ථානය වචනයට පමණක් සීමා නොකර එය මහපොළොවේ සත්යයක් බවට පත් කිරීමට අප සැම කැපවිය යුතු බවයි. ශාසනයේ ආරක්ෂකයන් වන මහා සංඝරත්නය සුරකිමින් සහ චීවරයට ගරු කරමින්, බෞද්ධයන් ලෙස මෙම අභියෝග හමුවේ හුදු ප්රේක්ෂකයන් බවට පත් නොවී ශක්තිසම්පන්නව ශාසනය වෙනුවෙන් පෙනී සිටිය යුතු බව ඔහු මෙහිදී පෙන්වා දුන්නේය.
අතීතයේ පැවති සෘජු අධිරාජ්යවාදය අද වන විට වක්ර ලෙස මෙරටට බලපෑම් කරමින් පවතින බවත්, ආර්ථික සහ රාජ්ය තාන්ත්රික වශයෙන් එල්ල වන එම අභියෝග ජය ගැනීමට ලක්ෂ 220ක ජනතාවම එකට අත්වැල් බැඳගත යුතු බවත් විපක්ෂ නායකවරයා මෙහිදී වැඩිදුරටත් ප්රකාශ කළේය. බුද්ධ ශාසනය සුරක්ෂිත කරන අතරම සෙසු ආගම් හා සංස්කෘතීන්ට ගරු කිරීම තුළින් රටේ ඒකීයභාවය සහ සංහිඳියාව ශක්තිමත් කළ හැකි බව පෙන්වා දුන් ඒ මහතා, දිවයින පුරා පවතින වෙහෙර විහාර, පිරිවෙන් සහ දහම් පාසල් පද්ධතිය ප්රායෝගිකව ශක්තිමත් කිරීමේ අවශ්යතාව ද අවධාරණය කළේය. රජ දවසේ මෙන් ඇස් හිස් මස් ලේ දන් දී රටේ සෛරීත්වය ආරක්ෂා කළ අභිමානවත් ජාතියක් ලෙස, අද දවසේ එල්ල වන අභියෝග හමුවේ නිවටයන් නොවී රට සහ ශාසනය රැක ගැනීමට සියලු පුරවැසියන් පෙරමුණ ගත යුතු බව විපක්ෂ නායකවරයා සිය කතාවේදී වැඩිදුරටත් සඳහන් කළේය.
