දිවයින පුරා විසිරී ඇති වසර 100කට වඩා පැරණි තැපැල් කාර්යාල 200ක් නවීකරණය කිරීම සඳහා රජය රුපියල් මිලියන 600ක ප්රතිපාදන වෙන් කර ඇති බව තැපැල්පති රුවන් සත්කුමාර මහතා ප්රකාශ කළේය. තැපැල්පතිවරයා මේ බව කියා සිටියේ වසර 150කට වඩා පැරණි බගවන්තලාව ප්රාදේශීය තැපැල් කාර්යාලය ප්රතිසංස්කරණය කර අද (16) ජනතා අයිතියට පත් කිරීමේ නිල උත්සවයට එක්වෙමිනි.
ඉපැරණි තැපැල් කාර්යාල වඩාත් ආකර්ෂණීය සේවා මධ්යස්ථාන බවට පත් කිරීම මෙම ව්යාපෘතියේ අරමුණ වන අතර, එමගින් සේවාලාභීන් වැඩි වශයෙන් තැපැල් සේවාවන් වෙත ආකර්ෂණය කර ගැනීමට අපේක්ෂා කෙරේ. නවීකරණය කෙරෙන කාර්යාල සඳහා විශේෂිත මූල්ය ඉලක්ක ලබා දී ඇති බවත්, කාර්යක්ෂම සේවාවක් සැපයීම හරහා නවීකරණයට වැය වූ පිරිවැය නැවත උපයා ගැනීමට හැකි වනු ඇති බවත් ඔහු මෙහිදී අවධාරණය කළේය. විශේෂයෙන් සේවාලාභීන්ට විනිවිදභාවයකින් යුත් කාර්යක්ෂම සේවාවක් සැපයීම සඳහා වීදුරු කවුළු සහිත නවීන පද්ධතියක් හඳුන්වා දෙන ලෙස ද ඔහු සේවක මණ්ඩලයෙන් ඉල්ලා සිටියේය
