පේරාදෙණිය විශ්වවිද්යාලයේ උපකුලපති ටෙරන්ස් මධුජිත් පසුගිය 19 වන දින කෝප් කමිටු සමාලෝචන රැස්වීමේදී පේරාදෙණිය විශ්වවිද්යාලයේ ක්රීඩා පිටිය මැදින් රිකිල්ලගස්කඩට යන පාරක් වැටී තිබෙන බවත්, එම පාරෙන් සාමාන්ය ජනතාව හත් අට දහසක් දිනපතා ගමන් කරන බවත්, කියමින් ”පොට පටලවා” ගත් සිදුවීමක් වාර්තා වී තිබේ.
අදාළ රැස්වීම් වාරය තුළ පේරාදෙණිය විශ්වවිද්යාලයේ හිටපු වැඩබලන ලේඛකාධිකාරීවරියක්, විශ්වවිද්යාල ක්රීඩා පිටිය තම හිතවතුන් පිරිසකට භාවිතය සඳහා ලබාදීම සම්බන්ධයෙන් අල්ලස් කොමිසම මගින් වරදකරු කර තිබෙන බවට මතුවූ කාරණයක් සම්බන්ධයෙන් පිළිතුරු ලබාදීමේදී මෙම බරපතල පටලැවිල්ල සිදුව තිබේ.
අදාළ වරද සම්බන්ධයෙන් එම නිලධාරිනිය අල්ලස් කොමිසම මගින් වරදකරු කර තිබෙන බවද, ඒ වෙනුවෙන් රුපියල් 1000ක ගාස්තුවක් පසුව ගෙවා තිබෙන බවද, විගණන වාර්තාවේ සඳහන්ව තිබෙන බව කෝප් සභාපතිවරයා කියා සිටියදීත්, උපකුලපති මධුජිත් කියා සිටියේ විශ්වවිද්යාල ක්රීඩා පිටිය මැදින් රිකිල්ලගස්කඩට වැටී ඇති මාර්ගය දිගේ යන දහස් ගණනක් වන ජනතාවගෙන් තුන් හතර දෙනෙකු ක්රීඩා පිටියේ කෙළවරක ක්රීඩා කර තිබෙන බවත්, ඔවුන් අදාළ නිලධාරිනියගේ ගමේ අසල්වාසීන් වූ බැවින් ඇය ඒ සඳහා අවසර ලබාදී තිබෙන බවත්ය. මෙම පිළිතුර ”කිතුල් ගහට නැග්ග මිනිහාගේ උපමාව” සිහිගන්වන ආකාරයක් පෙනේ. උපකුලපතිවරයාට අනුව වරද කර ඇති බව පෙනෙන්නේ එම අහිංසක නිලධාරිනිය නොව අල්ලස් කොමිසමය.
මධුජිත් නොදන්නා මුත් රිකිල්ලගස්කඩ සඳහා වන ප්රසිද්ධ මාර්ගය වැටී ඇත්තේ තැන්නෙකුඹුර, හාරගම සහ හඟුරන්කෙත නගරය හරහා වේ.
අතේ පැලවෙන බොරු කියන විට මෙවැනි පටලැවීම් සිදුවීම සාමාන්ය කරුණකි. කෙසේ වෙතත් පේරාදෙණිය විශ්වවිද්යාලය මැදින් රිකිල්ලගස්කඩට මාර්ගයක් වැටී තිබෙන බවට උපකුලපති මධුජිත් කියන කතාව ”පරංගියා කෝට්ටේ ගියා වගේ” යන කතාවට සමපාත කරමින් නිවැරදි ලෙස තර්ක කිරීමටද හැකියාවක් ඇත. ඒ මේ අයුරිනි.
පේරාදෙණිය විශ්වවිද්යාලයේ ක්රීඩාංගණය අසලින් පරණ ගලහ පාර වැටී තිබේ. මෙම පාර දිගේ දෙල්තොට හරහා දීර්ඝ ගමනකින් රිකිල්ලගස්කඩ දක්වා ගමන් කළ හැකිය. මෙම මාර්ගය මාර්ග සංවර්ධන අධිකාරියේ වර්ග කිරීම අනුව B364 අංකය දරන මාර්ගයයි.
එම නිසා කවුරුත් හොඳින් දන්නා ”පරණ ගලහ පාර” රිකිල්ලගස්කඩ මාර්ගය ලෙස හැඳින්වීමෙහි වරදක් නැති බව මධුජිත් උපකුලපතිවරයාට තර්ක කළ හැකි අතර ”රිකිල්ලගස්කඩ පාර” ලෙස සඳහන් නාමපුවරුවක්ද එම මාර්ගයේ සවිකිරීම මගින් එම අලුත් මාර්ගය පිළිබඳව මහජනතාව දැනුවත් කළ හැකි බව පෙන්වා දීමද අපගේ යුතුකමකි.
