රාත්රී කාලයේ නගරයේ වීදි පුරා සැරිසරන වල් ඌරන් රංචුවක් පසුපස පන්නමින්, ඔවුන්ට පෝලන්ත බසින් බැන වදිමින් පලවා හරින රොබෝවරයෙකුගේ පුවතක් පෝලන්තයේ වෝර්සෝ නුවරින් වාර්තා වේ. ‘එඩ්වඩ් වෝර්චොකි’ (Edward Warchocki) ලෙස නම් කර ඇති මෙම රොබෝවරයා වල් ඌරන් දෙසට දිව යමින් “පලයන් යන්න!” යැයි කෑගසන අයුරු දැක්වෙන වීඩියෝවක් මේ වන විට සමාජ මාධ්ය පුරා වේගයෙන් ප්රචාරය වෙමින් පවතී.
මෙම රොබෝවරයා චීනයේ නිෂ්පාදිත Unitree G1 නම් මාදිලියට අයත් වන්නකි. මෙය පෝලන්ත බලධාරීන් විසින් වන සතුන් පලවා හැරීමට යොදාගත් නිල වැඩසටහනක් ලෙස මුලින් පෙනී ගියද, සත්ය වශයෙන්ම මෙය සමාජ මාධ්ය අවධානය දිනාගැනීම සඳහා නිර්මාණය කරන ලද වීඩියෝවකි. රොබෝවාගේ ක්රියාකාරිත්වය ස්වයංක්රීයව සිදුවන්නක් ලෙස පෙනුණද, තාක්ෂණික විශේෂඥයින් පවසන්නේ මෙය දුරස්ථ පාලක මගින් හෝ පෙර-පුහුණුවීම් මත පදනම්ව සිදුකළ රංගනයක් බවයි.
මෙම විනෝදාත්මක වීඩියෝව පිටුපස වෝර්සෝ නුවර මුහුණ දී සිටින බරපතල වන ඌරු කරදරය පිළිබඳ ගැටලුව සැඟවී තිබේ. මිනිසුන් බැහැර කරන ආහාර සොයා වන ඌරන් නේවාසික ප්රදේශවලට කඩා වැදීම පෝලන්තයේ නගරවලට විශාල හිසරදයක් වී ඇති අතර, සතුන් ඝාතනය කිරීමට සත්ව අයිතිවාසිකම් සංවිධාන විරුද්ධ වීම නිසා බලධාරීන් දැඩි අර්බුදයකට ලක්ව සිටී. ‘එඩ්වඩ්’ රොබෝවරයාගේ මෙම දර්ශනය අනාගතයේදී තාක්ෂණය සහ සොබාදහම අතර ඇතිවිය හැකි ගැටුමේ සංකේතාත්මක පෙරනිමිත්තක් ලෙස ද විචාරකයෝ හඳුන්වති.
