අලි-මිනිස් ගැටුම්, ගංවතුර සහ දුම්රිය අනතුරු හේතුවෙන් මව්වරුන්ගෙන් වෙන්වන සහ තුවාල ලබන අලි පැටවුන්ගේ ජීවිත ආරක්ෂා කිරීම සඳහා පොළොන්නරුවේ කලාහගල ප්‍රදේශයේ නව ඇත්අතුරු සෙවණක් ස්ථාපිත කිරීමට පියවර ගෙන තිබේ.
පොළොන්නරුව දිස්ත්‍රික් ලේකම් සුජන්ත ඒකනායක මහතා සඳහන් කළේ, වනජීවී දෙපාර්තමේන්තුවේ පශු වෛද්‍යවරුන්, වන සංරක්ෂණ දෙපාර්තමේන්තුවේ නිලධාරීන් සහ මහජන නියෝජිතයන්ගෙන් සමන්විත විශේෂඥ කමිටුවක් සිදුකළ සමීක්ෂණයකින් අනතුරුව මෙම ස්ථානය තෝරාගත් බවයි.
ඒ අනුව, පොළොන්නරුව නගරයට ආසන්න කලාහගල ප්‍රදේශයේ වන සංරක්ෂණ දෙපාර්තමේන්තුව සතු හෙක්ටයාර 15ක පමණ භූමි ප්‍රමාණයක් මේ සඳහා ලබාදීමට වන සංරක්ෂණ අධ්‍යක්ෂ ජනරාල්වරයාගේ එකඟතාව හිමිව තිබේ.
දැනට ශ්‍රී ලංකාවේ ක්‍රියාත්මක වන එකම ඇත්අතුරු සෙවණ උඩවලව ප්‍රදේශයේ පිහිටා ඇති අතර, පොළොන්නරුවේ සිට එහි අලි පැටවෙකු ප්‍රවාහනය කිරීමට පැය 7ත් 9ත් අතර කාලයක් ගතවන බව සඳහන් වේ. තුවාල ලැබූ අලි පැටවුන් මෙතරම් දුරක් ප්‍රවාහනය කිරීමෙන් ඔවුන්ගේ ජීවිතවලට අවදානමක් ඇතිවිය හැකි බැවින්, නව මධ්‍යස්ථානය ස්ථාපිත කිරීමෙන් පැයක් හෝ දෙකක් ඇතුළත අවශ්‍ය පශු වෛද්‍ය ප්‍රතිකාර ලබාදීමට හැකිවනු ඇතැයි අපේක්ෂා කෙරේ.
හිටපු වනජීවී අධ්‍යක්ෂ ජනරාල්වරයෙකු සහ අලි පර්යේෂකයෙකු වන ආචාර්ය සුමිත් පිළපිටිය මහතා පෙන්වා දෙන්නේ, ශ්‍රී ලංකාවේ අලි ගහනය උතුරු හා උතුරු මැද, නැගෙනහිර සහ දකුණ ලෙස ප්‍රධාන උපගහන තුනකට බෙදා හඳුනාගෙන ඇති බවයි.
දිවයිනේ විවිධ ප්‍රදේශවලින් රැගෙන එන අලි පැටවුන් උඩවලව ප්‍රදේශයේදී රැකබලාගෙන පසුව දකුණු කලාපයේ වනජීවී රක්ෂිතවලට මුදාහැරීමෙන් මෙම උපගහන අතර ස්වභාවිකව පවතින වෙන්වීම වෙනස් වීමේ අවදානමක් ඇති බවද ඔහු පෙන්වා දෙයි.
එබැවින්, පොළොන්නරුවේ නව මධ්‍යස්ථානය මඟින් උතුරු හා උතුරු මැද කලාපවලින් රැගෙන එන අලි පැටවුන්ට ප්‍රතිකාර කිරීමෙන් පසු එම කලාපවල වනජීවී රක්ෂිතවලටම මුදාහැරීමට හැකිවීම විද්‍යාත්මක වශයෙන් වැදගත් බව ඔහු අවධාරණය කර තිබේ.
මෙම මධ්‍යස්ථානය ස්ථාපිත කිරීමෙන් පොළොන්නරුව දිස්ත්‍රික්කයේ සංචාරක ආකර්ෂණය ඉහළ නැංවීමට මෙන්ම අලි පැටවුන් සඳහා ආහාර සැපයීම ඇතුළු සේවා හරහා ප්‍රදේශවාසීන්ට ඍජු හා වක්‍ර රැකියා අවස්ථා උදාකිරීමටද හැකිවනු ඇතැයි දිස්ත්‍රික් ලේකම්වරයා සඳහන් කළේය.
