රටක් ගොඩනැගීමේදී හුදු භෞතික සංවර්ධනය පමණක් ප්රමාණවත් නොවන බවත්, එම සංවර්ධනය රටේ සංස්කෘතිය සහ ඓතිහාසික උරුමයන් සමඟ ඓන්ද්රීයව බැඳී පැවතිය යුතු බවත් ජනාධිපති අනුර කුමාර දිසානායක මහතා පෙන්වා දී තිබේ. ජනාධිපති කාර්යාලයේදී බුද්ධශාසන, ආගමික සහ සංස්කෘතික කටයුතු අමාත්යාංශයේ 2026 වසරේ ව්යාපෘති ප්රගතිය සමාලෝචනය සහ 2027 අයවැය යෝජනා පිළිබඳ සාකච්ඡාවට එක්වෙමින් ඔහු මේ බව සඳහන් කළේය.
මෙම සාකච්ඡාවේදී රටක දියුණුව අත්පත් කරගත හැක්කේ සිය සංස්කෘතික පදනම සහ වටිනාකම් මත පිහිටා බවත්, ජාතීන් අතර සමගිය සහ සහජීවනය ගොඩනැගීමට එය ඉතා වැදගත් වන බවත් ජනාධිපතිවරයා පෙන්වා දුන්නේය. අමාත්යාංශය යටතේ පවතින ප්රධාන අංශ 03 සඳහා වෙන් කරන ලද පුනරාවර්තන වියදම් (රුපියල් මිලියන 9,535.45) සහ ප්රාග්ධන වියදම් (රුපියල් මිලියන 5,401.40) යටතේ ක්රියාත්මක ව්යාපෘති මෙහිදී පුළුල් ලෙස විමසා බලන ලදී. ග්රාමීය ආගමික ස්ථානවල යටිතල පහසුකම් සංවර්ධනය, දානශාලා ඉදිකිරීම, දහම් පාසල් සංවර්ධනය සහ ආපදාවලින් විනාශ වූ ආගමික ස්ථාන නැවත ගොඩනංවා ගැනීම වෙනුවෙන් රුපියල් මිලියන 601ක ප්රතිපාදන යටතේ ක්රියාත්මක ව්යාපෘතිද සමාලෝචනය කෙරිණි.
පසුගිය රජයන් යටතේ අක්රමවත් ලෙස අතහැර දමා තිබූ ජාතික කලාභවන නවීකරණය, ජෝන් ද සිල්වා සමරු රඟහල සහ අමරදේව අසපුව වැනි ව්යාපෘතිවල ගැටලු නිරාකරණය කරමින් ඒවා කඩිනමින් අවසන් කිරීමට සැලසුම් කර ඇති අතර, විශේෂයෙන්ම ජාතික කලාභවනේ ඉදිකිරීම් කටයුතු මෙම වසර අවසන් වන විට නිම කරන ලෙස ජනාධිපතිවරයා උපදෙස් දුන්නේය. ජාතික කෞතුකාගාරය සහ ලේඛනාරක්ෂක දෙපාර්තමේන්තුව ඩිජිටල්කරණය කිරීමේ ව්යාපෘති කඩිනම් කරන ලෙසත්, නූතන තාක්ෂණය භාවිතා කරමින් ඉතිහාසය සජීවීව අත්විඳිය හැකි අන්දමින් කෞතුකාගාර ප්රවර්ධනය කරන ලෙසත් දන්වා ඇත.
මහාභාරකාර දෙපාර්තමේන්තුව සතු දේපළ පාලනයේදී පවතින දුර්වලතා වළක්වා ගැනීමට නව නීතිමය රාමුවක් සකස් කරන ලෙසත්, එකම කාර්යය සිදු කරන අමාත්යාංශය යටතේ පවතින ආයතන එකතු කරමින් ඒකාබද්ධ යෝජනාවක් සකස් කරන ලෙසත් නිලධාරීන්ට උපදෙස් ලබා දී තිබේ. මීට අමතරව, 2027 වසරේදී සමකාලීන කලාව සහ කලාකරුවන් වෙනුවෙන් විධිමත් ක්රමවේදයක් සහිත නව අරමුදලක් පිහිටුවීම පිළිබඳවද මෙහිදී සාකච්ඡා කෙරිණි.
අමාත්යවරුන්, නියෝජ්ය අමාත්යවරුන්, අමාත්යාංශ ලේකම්වරුන් සහ රාජ්ය නිලධාරීන් රැසක් මෙම අවස්ථාවට එක්ව සිටියහ.
