අප දළදා හාමුදුරුවන් ආරක්ෂා කළාට වඩා, උන්වහන්සේගේ ආශිර්වාදයෙන් මාතෘභූමිය ආරක්ෂා වූ බව ජනාධිපති ගෝඨාභය රාජපක්ෂ මහතා පවසයි.
ජීවමාන බුදුන් වහන්සේට දක්වන ගෞරවය ඒ ආකාරයෙන්ම දළදා හාමුදුරුවන්ටත් පුදකරන අතර, පුරාණ චාරිත්ර වාරිත්ර අනුව එය ඉටුකිරීමට බැඳී සිටින බව ජනාධිපතිවරයා කියා සිටීයේය.
ජනාධිපතිවරයා මේ බව පැවසුවේ ඓතිහාසික දළදා පෙරහර මංගල්යය සාර්ථකව පවත්වා සමාප්ත කළ බව සැලකිරීමට මහනුවර ජනාධිපති මන්දිරයේ ඊයේ (04) පස්වරුවේ පැවති උත්සවයේ දීය.
අප දේශයේ විචිත්ර සංස්කෘතික මංගල්යය ලෙසින් පිළිගනු ලබන මහනුවර ඇසළ පෙරහර පෞරාණික චාරිත්රානුකූලව සාර්ථකව පවත්වා අවසන් කළ බව දැක්වෙන ඇසළ පෙරහර සංදේශය ශ්රී දළදා මාලිගාවේ දියවඩන නිලමේ ප්රදීප් නිලංග දෑල මහතා ජනාධිපතිවරයා වෙත පිළිගැන්වීය.
ඇසළ පෙරහර සමාප්තිය සනිටුහන් කරමින් ජනාධිපතිවරයා මහනුවර ජනාධිපති මන්දිර පරිශ්රයේ නා පැලයක් ද රෝපණය කළේය.
දියවඩන නිළමේ ප්රදිප් නිලංග දෑල මහතා විසින් සංදේශය ඉදිරිපත් කරනු ලැබිණ.
ඇසළ පෙරහර භාරය පිටිසර දේවාල සඳහා කරන මුදල් ආධාර ප්රදානය ජනාධිපතිවරයා අතින් සිදු කෙරිණ.
මධ්යම පළාත් ආණ්ඩුකාර ලලිත් යූ. ගමගේ මහතා “පූජනීය දළදා සංස්කෘතිය” ග්රන්ථය ජනාධිපතිවරයා වෙත පිළිගැන්වීය.
කොවිඩ් තර්ජනය හමුවේ සෞඛ්ය නියමයන් ආරක්ෂා කර, පුරාණ චාරිත්ර ඉටුකරමින් පෙරහර සාර්ථකව පවත්වා දළදා හාමුදරුවන්ට ගෞරව දැක්වීමට හැකි වූ බව ජනාධිපතිවරයා පැවසීය.
“පෙරහර අපේ අගනාම සංස්කෘතික මංගල්යයක්. දේශීය කලාකරුවන්ගේ දක්ෂතා සේම පාරම්පරික කලා උරුමය රැක ගැනීමට සහ ප්රවර්ධනයට රජය කටයුතු කරනවා” ජනාධිපතිවරයා කියා සිටියේය.
පසුගිය කාලය තුළ පෙරහර මංගල්යයට හිලෑ අලි ඇතුන් සපයා ගැනීම ගැටළුවක්ව තිබිණ. නැවත එවැනි ගැටළුවක් ඇති නොවනු පිණිස හිලෑ අලි අතුන් සංස්කෘතියේ සහ උරුමයේ කොටසක් ලෙස සලකන බව රාජපක්ෂ මහතා පැවසීය.
