වයස අවුරුදු 18ට අඩු දරුවන්ට ලැබෙන සෞඛ්ය පහසුකම් පුළුල් කිරීමේ අරමුණින් ජනාධිපති අරමුදල සහ ජනශක්ති පදනම අතර සුවිශේෂී සහයෝගීතාවක් අද (06) පෙරවරුවේ ආරම්භ විය. “හෙට දිනන ලොවකට අද සුවය සදමු” යන තේමාව යටතේ ක්රියාත්මක මෙම වැඩසටහන මඟින් දරුවන්ගේ වෛද්ය ප්රතිකාර සඳහා පවතින මූල්ය බාධා අවම කිරීමට අපේක්ෂා කෙරේ.
ජනාධිපති අරමුදල මඟින් ප්රතිකාර සඳහා වැය වන මුදලින් කොටසක් ගෙවන අතර, ජනශක්ති පදනම විසින් ඊට සමාන මුදලක් හෝ ඉතිරි වියදම යන දෙකෙන් අඩු වටිනාකම පියවනු ලබයි. මෙම සහනය ලබා ගැනීම සඳහා අයදුම්කරුවන් ජනාධිපති අරමුදලට අයදුම් කිරීමේදී තම තොරතුරු ජනශක්ති පදනම වෙත ලබා දීමට අවසර දෙන ආකෘති පත්රය සම්පූර්ණ කළ යුතුය. මූල්ය සහාය අවශ්ය දරුවන් හඳුනා ගැනීම සහ මුදල් අනුමත කිරීමේ ක්රියාවලිය තවදුරටත් ජනාධිපති අරමුදල හරහාම සිදු කෙරේ. සාමාන්යයෙන් ප්රතිකාර අවසානයේ මුදල් ගෙවන නමුත්, හදිසි ප්රතිකාර සහ විදේශගතව සිදු කරන ප්රතිකාර සඳහා අවශ්ය මුදල් ප්රතිකාරයට පෙර ලබා දීමට ද මෙහිදී විධිවිධාන සලසා ඇත.
මෙම වැඩසටහන යටතේ අමතර අරමුදල් ලබා ගැනීම සඳහා අයදුම්කරුවන්ට 2026 මැයි මස 15 වන දින සිට සුදුසුකම් ලැබිය හැකිය. කොළඹ හිල්ටන් හෝටලයේ පැවති මෙම අවස්ථාවට ජනාධිපති අරමුදලේ ලේකම් රෝෂන් ගමගේ, ජනශක්ති සමූහයේ කළමනාකාර අධ්යක්ෂ රමේෂ් ශාෆ්ටර් ඇතුළු නිලධාරීහු පිරිසක් සහභාගී වූහ.
