වැල්ලස්ස, බින්තැන්න සහ නැගෙනහිර තෙපළාතේ ප්රධාන සංඝනායක පදවියෙන් පිදුම් ලැබූ පූජ්ය මහාචාර්ය මහඔය ජිනරතන ස්වාමීන් වහන්සේ උදෙසා පැවැත්වුණු අභිනන්දන පුණ්ය මහෝත්සවය ඊයේ (14) ඓතිහාසික පොතුබන්ධන රාජමහා විහාරස්ථානයේදී උත්කර්ෂවත් අන්දමින් පැවැත්විණි. අග්රාමාත්ය හරිනි අමරසූරිය මහත්මියගේ ප්රධානත්වයෙන් සහ මල්වතු මහා විහාර පාර්ශවයේ අනුනායක අතිපූජ්ය දිඹුල්කුඹුරේ විමලධම්ම අනුනාහිමියන්ගේ අනුශාසකත්වයෙන් මෙම උත්සවය සංවිධානය කර තිබුණි.
මෙහිදී අග්රාමාත්යවරිය විසින් පූජ්ය මහාචාර්ය මහඔය ජිනරතන හිමියන් වෙත ශ්රී සන්නස් පත්රය පිළිගන්වන ලදී. සභාව අමතමින් අග්රාමාත්යවරිය සඳහන් කළේ 1982 වසරේදී සෙවණැලි සඟ සසුනට ඇතුළත් වූ ජිනරතන හිමියන් දශක හතරකට වැඩි කාලයක් තිස්සේ ශාසනයට සහ සමාජයට සිදුකළ සේවය අතිමහත් බවයි. ශ්රී සරණංකර සහ ශ්රී සද්ධාතිස්ස දහම් පාසල් පවත්වාගෙන යාම, දීඝවාපි පිරිවෙනේ ප්රධානියා ලෙස කටයුතු කිරීම සහ දීඝවාපි මහා සෑයේ ප්රතිසංස්කරණ කටයුතු වෙනුවෙන් උන්වහන්සේ දැක්වූ දායකත්වය මෙහිදී විශේෂ ඇගයීමට ලක්විය. මීට අමතරව අම්පාර මහා රෝහලේ භික්ෂු වාට්ටුවක් ඉදිකිරීම ඇතුළු සමාජ සත්කාර රැසක් උන්වහන්සේ විසින් ඉටුකර ඇත.
මෙම අභිනන්දන මහෝත්සවය සඳහා ත්රෛනිකායික මහා සංඝරත්නය, අමාත්ය සමන්ත විද්යාරත්න, නියෝජ්ය අමාත්ය ආර්.එම්. ජයවර්ධන, විපක්ෂ නායක සජිත් ප්රේමදාස, ඌව පළාත් ආණ්ඩුකාරවරයා ඇතුළු රාජ්ය නිලධාරීන් සහ විශාල පිරිසක් සහභාගී වී සිටියහ.
