ශ්රී ලංකාවේ ඩිජිටල් ආර්ථිකය සහ විදේශ විනිමය උපයන්නන් වෙනුවෙන් විප්ලවීය වෙනසක් සිදු කරමින්, මෙරට ප්රමුඛ වාණිජ බැංකු සහ PayPal ආයතනය අතර සහයෝගීතාවය අද (15) නිල වශයෙන් ආරම්භ විය. අග්රාමාත්ය හරිනි අමරසූරිය මහත්මියගේ ප්රධානත්වයෙන් පැවැති මෙම උත්සවයේදී ඇය ප්රකාශ කළේ, මෙය ශ්රී ලංකාව ගෝලීය ඩිජිටල් සිතියමේ නිසි ස්ථානය ලබාගැනීම සනිටුහන් කරන ඓතිහාසික අවස්ථාවක් බවයි. විශේෂයෙන්ම මෙරට සිටින දක්ෂ නිදහස් වෘත්තිකයින් (Freelancers), සුළු හා මධ්ය පරිමාණ ව්යවසායකයින් (SME) සහ ආරම්භක ව්යාපාර (Start-ups) සඳහා විනිවිදභාවයෙන් යුතු ආරක්ෂිත මූල්ය පද්ධතියක් ස්ථාපිත කිරීම රජයේ ප්රමුඛ ඉලක්කයක් බව ඇය මෙහිදී අවධාරණය කළාය.
PayPal ආයතනයේ ජාත්යන්තර දේශසීමා වෙළෙඳ අංශයේ ජ්යෙෂ්ඨ උප සභාපතිනී නාඩියා සයීඩ් මහත්මිය සඳහන් කළේ, ලංකා බැංකුව, කොමර්ෂල් බැංකුව සහ සම්පත් බැංකුව සමඟ අත්වැල් බැඳගනිමින් ශ්රී ලාංකික ගනුදෙනුකරුවන්ට විදේශයන්හි සිට මුදල් ලබාගැනීම සඳහා වඩාත් සුරක්ෂිත සහ පහසු මාවතක් විවර කරන බවයි. ඉදිරි සති කිහිපය තුළ මෙම සේවාවන් ලබාගත හැකි ආකාරය පිළිබඳ වැඩිදුර තොරතුරු ප්රකාශයට පත් කිරීමට නියමිතය. මෙරට දළ දේශීය නිෂ්පාදිතයට 52%ක දායකත්වයක් සපයන සුළු හා මධ්ය පරිමාණ ව්යවසායකයින්ට ගෝලීය වෙළෙඳපොළ ජය ගැනීමටත්, අන්තර්ජාල වංචාවන්ගෙන් තොරව ජාත්යන්තර ගනුදෙනු සිදු කිරීමටත් මෙමගින් විශාල පිටුවහලක් ලැබෙනු ඇතැයි රජය අපේක්ෂා කරයි.
