ත්රස්තවාදය වැළැක්වීමේ පනත (PTA) යටතේ රඳවා සිටින පුද්ගලයින්ගේ මානව හිමිකම් උල්ලංඝනය වන බවත්, එම පනත වහාම අහෝසි කළ යුතු බවත් සිරකරු අයිතිවාසිකම් සුරැකීමේ කමිටුව අවධාරණය කරයි. ඔවුන් මේ බව ප්රකාශ කළේ අද (09) බොරැල්ලේ පැවති මාධ්ය හමුවකදීය.
මෙහිදී අදහස් දැක්වූ සුදේශ් නන්දිමාල් මහතා, රාජ්ය බුද්ධි සේවයේ හිටපු ප්රධානී සුරේෂ් සලේ මහතා සම්බන්ධයෙන් මතු වී ඇති චෝදනා සහ ඒ වටා ගොඩනැගී ඇති දේශපාලන කතාබහ දැඩි ලෙස විවේචනය කළේය. ඔහු සඳහන් කළේ, අතීතයේදී කොස්ගොඩ තාරක වැනි පුද්ගලයින් ඝාතනයට ලක්වන විට හෝ සිරකරුවන්ට අමානුෂික සැලකිලි ලැබෙන විට නිහඬව සිටි පිරිස්, වර්තමානයේදී ඇතැම් පුද්ගලයින් වෙනුවෙන් පමණක් “කිඹුල් කඳුළු” හලමින් දේශපාලන වාසි ලබා ගැනීමට උත්සාහ කරන බවයි.
එම මාධ්ය හමුවේදී අදහස් දැක්වූ නීතිඥ සේනක පෙරේරා මහතා පෙන්වා දුන්නේ, සුරේෂ් සලේ මහතා සම්බන්ධයෙන් වධහිංසා හෝ අමානුෂික සැලකීම් සිදුවී ඇත්නම්, එම චෝදනා පිළිබඳව රජය විසින් නිසි සහ විනිවිදභාවයකින් යුත් පරීක්ෂණයක් පවත්වා සත්යය රටට අනාවරණය කළ යුතු බවයි.
සිරකරු අයිතිවාසිකම් සුරැකීමේ කමිටුව නැවත වරක් අවධාරණය කර සිටින්නේ, නීතිය ක්රියාත්මක කිරීමේදී දේශපාලන හෝ වෙනත් පක්ෂග්රාහීත්වයකින් තොරව සියලුම රඳවියන්ගේ මානව හිමිකම් ආරක්ෂා කිරීමට රජය බැඳී සිටින බවයි.
