දිට්වා සුළි කුණාටුවෙන් පසුව පුත්තලම දිස්ත්රික්කයට බලපා ඇති අධික වර්ෂාව හේතුවෙන් පුත්තලම නගරයේ රාජ්ය ආයතන, පාසල්, ප්රධාන රෝහල සහ ගම්මාන රැසක් ජලයෙන් යට වී ඇති බව පුත්තලම දිස්ත්රික් ලේකම් වයි.එම්. ඉන්දික සිල්වා මහතා අද (13) ප්රකාශ කළේය. අද උදෑසන සිට ඇදහැලුණු මෙම මහ වැස්ස හේතුවෙන් පුත්තලම නගරයේ ප්රධාන සහ අතුරු මාර්ග රැසක් අඩි කිහිපයක් ජලයෙන් යට වී ගමනාගමන කටයුතුවලට දැඩි බාධා එල්ල වී තිබේ.
පොදු ස්ථාන සහ රාජ්ය ආයතනවලට එල්ල වූ බලපෑම
පුත්තලම ප්රධාන රෝහල් භූමිය ජලයෙන් යට වීම නිසා යුද හමුදාව සහ රෝහල් කාර්ය මණ්ඩලය එක්ව වාට්ටු ඒකක තුළට පිරී තිබූ ජලය ඉවත් කිරීමට දැඩි උත්සාහයක නිරත විය. මීට අමතරව පුත්තලම නියෝජ්ය පොලිස්පති කාර්යාලය, කාලගුණ විද්යා කාර්යාලය, ප්රාදේශීය ලේකම් කාර්යාලය සහ මූලස්ථාන පොලිසිය ඇතුළු වැදගත් රාජ්ය ආයතන රැසක් ද ජලයෙන් යට වී ඇති බව වාර්තා වේ.
පාසල් දරුවන්ට සහ ජන ජීවිතයට ඇති වූ බාධා
පාසල් ආරම්භ වීමෙන් පසු ඇදහැලුණු මෙම වර්ෂාව හේතුවෙන් ගුරුවරුන් සහ දරුවන් දැඩි අපහසුතාවයට පත් වූ අතර, නගරයේ සියලුම පාසල් ජලයෙන් යට වීම නිසා දරුවන් ආරක්ෂිතව නිවෙස් කරා රැගෙන යන ලෙස ගුරුවරුන් විසින් දෙමාපියන් දැනුවත් කරනු ලැබීය. පුත්තලම නගරයට අමතරව ආණමඩුව, මහකුඹුක්කඩවල, මුන්දලම, වනාතවිල්ලුව සහ පල්ලම යන ප්රදේශවල ද ජන ජීවිතයට මෙමගින් දැඩි බලපෑම් එල්ල වී තිබේ.
