සිවු මසක් තිස්සේ වැටුප් නොගෙවීම හේතුවෙන් පුත්තලම සහ පාලවිය අතර ධාවනය වන හුණුගල් ප්රවාහන දුම්රිය නවතා උණබම්බු ගේට්ටුකරුවන් පිරිසක් විරෝධතාවක නිරත වී ඇත.
පුත්තලම සිමෙන්ති කර්මාන්ත ශාලාවට අදාළ අරුවක්කාඩු දුම්රිය මාර්ගයේ සේවය කරන තාවකාලික ගේට්ටුකරුවන්ට මාස හතරක කාලයක සිට වැටුප් ලැබී නොමැත. කරඩිපුවල් දුම්රිය ස්ථානය ආසන්නයේදී දුම්රිය නවතා මොවුන් සහ ඔවුන්ගේ පවුල්වල සාමාජිකයන් පෙරේදා (02) මෙම විරෝධය පළ කර තිබේ.
වසර 14ක පමණ කාලයක සිට සේවය කරන මෙම පිරිසට මසකට ලැබෙන්නේ රුපියල් 7,500ක වැටුපක් පමණි. රජය විසින් වැඩිකළ රුපියල් 7,500ක දීමනාව සමඟ තමන්ට රුපියල් 15,000ක වැටුපක් ලැබිය යුතු වුවත්, දැනට ලැබෙන රුපියල් 7,500ක මුදල පවා මාස හතරකින් ලැබී නැති බව ඔවුහු පවසති.
වනාතවිල්ලුව පොලිස් නිලධාරීන් සහ දුම්රිය බලධාරීන් පැමිණ සාකච්ඡා කළද, විරෝධතාකරුවන් ඉවත් නොවූයේ සිමෙන්ති සමාගමේ වගකිවයුතු නිලධාරියෙකු පැමිණෙන තෙක්ය. පසුව එම ස්ථානයට පැමිණි සමාගමේ අදාළ නිලධාරියෙකු ගැටලුව විසඳීමට සති තුනක කාලයක් ඉල්ලා සිටි අතර, එම කාලය තුළ විසඳුමක් නොලැබුණහොත් අඛණ්ඩ විරෝධතාවල නිරත වන බව පවසමින් පිරිස විසිර ගියහ.
