සංවිධානාත්මක පාතාල කල්ලි නායක ‘හරක් කටා’ නමැත්තාට රැඳවුම් භාරයෙන් සහන සැලසීම සඳහා ඔහුගේ බිරිඳගෙන් රුපියල් කෝටි 12ක අල්ලස් මුදලක් ලබාගැනීමේ සිද්ධියට අදාළව හිටපු අධිකරණ අමාත්ය විජයදාස රාජපක්ෂ මහතාගේ පුත් නීතිඥ රඛිත රාජපක්ෂ ඇතුළු සැකකරුවන් තිදෙනෙකු ලබන මස 3 වැනිදා දක්වා රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත්වරයා නියෝග කර තිබේ. සජබ ආසන සංවිධායක චරිත් අබේසිංහ සහ සිවිල් ගුවන් සේවා අධිකාරියේ හිටපු අධ්යක්ෂ අරුණ වරුණ හැන්දිගේ යන සෙසු සැකකරුවන්ගේ ඇප ඉල්ලීම් ද අධිකරණය ප්රතික්ෂේප කළේය.
අල්ලස් සාකච්ඡා සඳහා 2023 වසරේදී මෙම පිරිස ඩුබායි බලා ගොස් ඇති අතර, එහිදී කෝටි 50ක මුදලක් ඉල්ලා පසුව එය කෝටි 12ක අත්තිකාරමක් ලෙස ‘ඩිරාම්’ මුදලින් ලබාගෙන ඇති බව විමර්ශනවලදී හෙළි වී ඇත. වඩාත්ම ආන්දෝලනාත්මක කරුණ නම්, මෙම අල්ලස් සාකච්ඡාවෙන් පසු සැකකරුවන් සමඟ එකම ගුවන් යානයකින් හිටපු අධිකරණ අමාත්ය විජයදාස රාජපක්ෂ මහතා ද ලංකාවට පැමිණ තිබීමයි. මේ හේතුවෙන් ඉදිරියේදී හිටපු ඇමැතිවරයාගෙන් ද ප්රකාශයක් ලබා ගැනීමට විමර්ශන කණ්ඩායම් සූදානම් වන අතර, ඔහු ද අත්අඩංගුවට පත්වීමේ දැඩි ඉඩකඩක් ඇති බවට සමාජ මාධ්ය පුරා දැඩි කතාබහක් මතු වී තිබේ.
