නෙඩෙන්තීව්, ඌර්කාවතුරෙයි, කාරයිනගර් සහ වේලනයි ඇතුළු දූපත් ප්රදේශවල ජනතාව මුහුණ දෙන අධ්යාපන, සෞඛ්ය, ප්රවාහන, පානීය ජල සහ කෘෂිකාර්මික ගැටලු සඳහා කඩිනම් විසඳුම් ලබාදෙන ලෙස ධීවර, ජලජ සහ සාගර සම්පත් අමාත්ය රාමලිංගම් චන්ද්රසේකර් මහතා නිලධාරීන්ට උපදෙස් ලබා දුන්නේය. වේලනයි ප්රාදේශීය ලේකම් කාර්යාලයේ පැවති විශේෂ සාකච්ඡාවකදී අමාත්යවරයා මේ බව අවධාරණය කළේය.
මෙම සාකච්ඡාවේදී දූපත්වල පවතින ගුරු හිඟය, ගුරු නවාතැන් පහසුකම් නොමැතිකම සහ නෙඩෙන්තීව් පාසල්වල පවතින අඩුපාඩු සම්බන්ධයෙන් විශේෂ අවධානයක් යොමු විය. අධ්යාපන ගැටලු සඳහා ප්රමුඛත්වය ලබාදෙමින් විශේෂ ක්රියාමාර්ග සැලැස්මක් සකස් කිරීමට අමාත්යවරයා නිලධාරීන්ට උපදෙස් දුන්නේය. ප්රවාහන ගැටලුවට විසඳුමක් ලෙස නෙඩෙන්තීව් ප්රවාහන සේවාවට යොදවන “නෙදුන්තාරකයි” සහ “වඩතාරකයි” බෝට්ටු ලබන මාසයේ සිට නැවත සේවයේ යෙදවීමට පියවර ගෙන තිබේ.
පානීය ජල ගැටලුව සඳහා නෙඩෙන්තීව් වෙත නව RO ජල පිරිපහදු පද්ධතියක් ස්ථාපනය කිරීමටත්, රෝහල්වල පවතින වෛද්ය සහ හෙද කාර්ය මණ්ඩල හිඟය මගහරවා ගැනීමටත් පියවර ගැනේ. අනලතීව් ප්රදේශයට නව ගිලන් රථයක් ලබාදීමට ද තීරණය කර ඇති අතර, ලෝක බැංකු ආධාර යටතේ රෝහල් ප්රතිසංස්කරණ කටයුතු සිදු කෙරේ. තවද, දිස්ත්රික්කයේ පවතින වැසිකිළි අවශ්යතා සපුරාලීමට ප්රමුඛතාව ලබා දෙන ලෙස ජනාධිපති අනුර කුමාර දිසානායක මහතා ද මීට පෙර අවධාරණය කර තිබූ බව අමාත්යවරයා සිහිපත් කළේය.
දිූපත්වල සිදුවන ගව සොරකම් මැඩපැවැත්වීමට පොලිසිය සහ විශේෂ කාර්ය බලකායේ සහාය ලබා ගැනීමටත්, මණ්ඩතීව් පරීක්ෂණ මුරපොළේ ආරක්ෂාව නාවික හමුදාව සමඟ ශක්තිමත් කිරීමටත් තීරණය විය. මීට අමතරව, අනලතීව්, පුංගුඩතීව් සහ කුරිකඩ්ඩුවන් ප්රදේශවල ලංකා බැංකු ATM යන්ත්ර ස්ථාපනය කිරීමට ද කඩිනම් පියවර ගනු ඇත. උතුරු පළාත් ආණ්ඩුකාරවරයා, දිස්ත්රික් ලේකම්වරුන්, පාර්ලිමේන්තු මන්ත්රීවරුන් සහ ආරක්ෂක අංශ නියෝජිතයන් මෙම අවස්ථාවට එක්ව සිටියහ.
