මාර්ග සංවර්ධන අධිකාරියේ (RDA) කොන්ත්රාත්කරුවන් පිරිසකට රුපියල් මිලියන 380කට ආසන්න මුදලක් දෙවතාවක් ගෙවීම් කිරීමේ සිද්ධිය සම්බන්ධයෙන් සමගි ජන බලවේගයේ පාර්ලිමේන්තු මන්ත්රී නලින් බණ්ඩාර මහතා අද (27) රජයට දැඩි චෝදනා එල්ල කළේය. මෙය හුදු තාක්ෂණික දෝෂයක් නම්, වෙනත් පුද්ගලයන්ගේ ගිණුම්වලට නොව මඩකලපුව දිස්ත්රික්කයේ නිශ්චිත කොන්ත්රාත්කරුවන් පිරිසකගේ ගිණුම්වලටම මෙම මුදල් බැර වූයේ කෙසේදැයි ඔහු විමසා සිටියි.
මෙම සිදුවීම සම්බන්ධයෙන් අදහස් දැක්වූ මන්ත්රීවරයා කියා සිටියේ, අදාළ මුදල් වැරදීමකින් බැර වූ බව පවසමින් ලංකා බැංකුව විසින් කොන්ත්රාත්කරුවන් වෙත ඒවා ආපසු අයකර ගැනීමට ලිපි පවා යවා ඇති බවයි. රජය හෝ බැංකුව මෙහි වගකීම භාර නොගෙන තොරතුරු හෙළිදරව් කරන පුද්ගලයන්ට චෝදනා කිරීම පලක් නොවන බවත්, මෙය රාජ්ය මුදල් අවභාවිත වීමක් බවත් ඔහු අවධාරණය කළේය.
2024 වසරේදී යම් දිනෙක ගෙවීම් කරනු ලැබූ කොන්ත්රාත්කරුවන් පිරිසකටම මෙලෙස නැවත ගෙවීම් සිදුකර ඇති අතර, මෙහි වගකීම ලංකා බැංකුව හෝ මාර්ග සංවර්ධන අධිකාරිය සතු විය යුතු බව මන්ත්රීවරයා පෙන්වා දෙයි. තාක්ෂණික දෝෂයක් මුවාවෙන් සිදුවී ඇති මෙම අක්රමිකතාව සම්බන්ධයෙන් වහාම අපරාධ පරීක්ෂණ දෙපාර්තමේන්තුවට (CID) පැමිණිලි කොට විධිමත් පරීක්ෂණයක් පවත්වන ලෙසද ඔහු රජයෙන් ඉල්ලා සිටියේය.
