පවතින අයහපත් කාලගුණ තත්ත්වය හේතුවෙන් අධිවේගී මාර්ගවල ගමන් කරන රියදුරන් සඳහා මාර්ග සංවර්ධන අධිකාරිය විසින් විශේෂ උපදෙස් මාලාවක් නිකුත් කර තිබෙනවා.
අධික වැසි සහිත කාලගුණයක් පවතින විට මාර්ගයේ ඉලෙක්ට්රොනික පුවරුවල (Electronic Displays) සඳහන් වන අවවාදාත්මක පණිවිඩ කෙරෙහි නිරන්තර අවධානයෙන් පසුවන්න. ඔබේ වාහනයේ ඉදිරිපස ලාම්පු (Headlights) දල්වා ධාවනය කිරීම අනිවාර්ය වේ.
වැසි සහිත කාලගුණයකදී වාහන ලිස්සා යාමේ ඉඩකඩ වැඩි බැවින්, අධිවේගී මාර්ගයේදී පැයට කිලෝමීටර් 60ක වේග සීමාවකට යටත්ව ගමන් කරන ලෙස රියදුරන්ගෙන් ඉල්ලා සිටිනවා. මීට අමතරව, ඉදිරියෙන් ගමන් කරන වාහනය සමඟ ආරක්ෂිත පරතරයක් පවත්වා ගන්නා ලෙසත්, හදිසියේ තිරිංග (Brakes) භාවිත කිරීමේදී වාහනය ලිස්සා යා හැකි බැවින් අතිශයින්ම පරෙස්සමින් රිය ධාවනය කරන ලෙසත් බලධාරීන් උපදෙස් දෙනවා.
