ජංගම දුරකථනයක් අස්ථානගත වීම හෝ සොරකම් කිරීමකදී එම දුරකථනයේ තිබෙන පුද්ගලික තොරතුරු, මූල්ය තොරතුරු හෝ ඡායාරූප අනිසි ලෙස භාවිත වීමට ඇති ඉඩකඩ වැඩි බව පොලිසිය පවසනවා. මෙවැනි තත්ත්වයකදී වින්දිතයෙකු නොවී කඩිනමින් ගත යුතු ක්රියාමාර්ග පිළිබඳව පොලිසිය මහජනතාව දැනුවත් කර තිබෙනවා.
පළමුව කළ යුතු දේ වන්නේ දුරකථනයක් අස්ථානගත වූ වහාම අදාළ සේවා සපයන ආයතනය හරහා ඔබේ සිම් පත (SIM) අක්රීය කිරීමයි. එමගින් නීති විරෝධී කටයුතු සඳහා ඔබේ දුරකථනය භාවිත වීමේ අවදානම නැති වන අතර, දුරකථනය නැවත සොයා ගැනීමටද එය පහසුවක් වෙනවා.
පොලිසියේ පැමිණිල්ලක් ඉදිරිපත් කරන විට ඔබේ ජංගම දුරකථනයේ IMEI අංකය සඳහන් කිරීම අනිවාර්යයි. දුරකථනයක් මිලදී ගත් පසු එම IMEI අංකය සහ සේවා විස්තර සුරක්ෂිතව තබා ගැනීම ඔබේ වගකීමක්. ඔබේ දුරකථනයේ IMEI අංකය දැනගැනීමට *#06# ලෙස ඇමතීමෙන් එය ලබාගත හැකියි.
ශ්රී ලංකා පොලිසිය විසින් හඳුන්වා දී ඇති ineed.police.lk
වෙබ් අඩවියට පිවිස ලියාපදිංචි වීමෙන් ඔබේ නැති වූ දුරකථනය සම්බන්ධයෙන් කඩිනමින් පියවර ගැනීමට පොලිසියට හැකි වෙනවා. දත්ත නිවැරදිව ලබා දීමෙන් පසු පසුගිය වසර කිහිපය තුළ විශාල දුරකථන ප්රමාණයක් සොයා ගෙන හිමිකරුවන් වෙත භාර දීමට පොලිසිය සමත්ව තිබෙනවා.
යමෙකුට අයිති නැති භාණ්ඩයක් හමු වුවහොත් එය තමා සන්තකයේ තබා ගැනීම දණ්ඩ නීති සංග්රහයට අනුව වසර 2ක සිරදඬුවමක් ලැබිය හැකි වරදක්. එම නිසා එවැනි දේපලක් හමු වුවහොත් වහාම ළඟම ඇති පොලිස් ස්ථානයට භාර දිය යුතුයි. එසේම සොරකම් කළ දුරකථන අඩු මිලට මිලදී ගැනීම වසර 3ක සිරදඬුවමක් ලැබිය හැකි බරපතළ වරදක්.
නව ජංගම දුරකථනයක් මිලදී ගැනීමේදී එම දුරකථනය සොරකම් කරන ලද්දක් දැයි පරීක්ෂා කර බැලීම සඳහා පොලිසියේ ‘I need system’ මෘදුකාංගය ඔස්සේ ඇති ‘Find Genuine Phone’ පහසුකම භාවිත කරන ලෙසත් පොලිසිය මහජනතාවට අවධාරණය කරනවා.
