වාද්දුව ප්රදේශයේදී පීලි පැනීමට ලක්වූ ‘සාගරිකා’ දුම්රිය හේතුවෙන් හානියට පත් මුහුදුබඩ දුම්රිය මාර්ගය සම්පූර්ණයෙන්ම යථා තත්ත්වයට පත් කිරීමට දින දෙකක පමණ කාලයක් ගතවනු ඇති බව දුම්රිය සාමාන්ය අධිකාරී රවීන්ද්ර පත්මප්රිය මහතා පවසයි.
පීලි පැනීමෙන් දුම්රිය මාර්ගයට මෙන්ම දුම්රිය මැදිරිවලට ද දැඩි හානි සිදුව ඇති බව සාමාන්්ය අධිකාරීවරයා සඳහන් කළේය. පවතින දුම්රිය බලඇණි හිඟය හමුවේ මෙය විශාල පාඩුවක් බවත් සාගරිකා දුම්රිය වෙනුවට විකල්ප දුම්රියක් යෙදවීම පිළිබඳව මේ වන විට සාකච්ඡා පවත්වන බවත් ඔහු පැවසීය.
මගී පීඩනය අවම කිරීම සඳහා ප්රවාහන අමාත්යාංශයේ උපදෙස් මත විශේෂ වැඩපිළිවෙළක් ක්රියාත්මක වන අතර කොළඹ සිට එන දුම්රිය පානදුර දක්වා ධාවනය කෙරෙන අතර එතැන් සිට දකුණු කළුතර දක්වා මගීන් ප්රවාහනයට ලංගම සහ ජාතික ගමනාගමන කොමිසම එක්ව අතිරේක බස් රථ යොදවා ඇත. දකුණු කළුතර සිට මාතර සහ බෙලිඅත්ත දක්වා දුම්රිය ධාවනය සාමාන්ය පරිදි සිදු වේ. අද සවස් කාලය වීමට පෙර එක් මාර්ගයක් පමණක් විවෘත කර දුම්රිය ධාවනය කිරීමට උත්සාහ කරන බව දෙපාර්තමේන්තුව පවසයි.
පවතින හදිසි තත්ත්වය සැලකිල්ලට ගෙන දුම්රිය දෙපාර්තමේන්තුව විසින් මුහුදුබඩ මාර්ගය සඳහා නව තාවකාලික කාලසටහනක් ද ප්රකාශයට පත් කර තිබේ.
