හැකර්වරුන්ගේ ග්රහණයට නතු වූ ඩොලර් ලක්ෂ 25ක (ඩොලර් මිලියන 2.5) මුදල සම්බන්ධයෙන් රජය මෙතෙක් විධිමත් හෝ සත්යවාදී ප්රකාශයක් සිදු කර නොමැති බව විපක්ෂ නායක සජිත් ප්රේමදාස මහතා චෝදනා කරයි. කුරුණෑගල මැල්සිරිපුර නා උයන ආරණ්ය සේනාසනයේ පැවැති වැඩසටහනකින් අනතුරුව මාධ්ය වෙත අදහස් දක්වමින් ඔහු මේ බව පැවසීය.
රජයේ විවිධ පාර්ශ්වයන් මෙම සිදුවීම සම්බන්ධයෙන් පරස්පර විග්රහයන් ඉදිරිපත් කරන බව විපක්ෂ නායකවරයා මෙහිදී පෙන්වා දුන්නේය. භාණ්ඩාගාර ලේකම් හර්ෂණ සූරියප්පෙරුම මහතා එක් කතාවක් පවසන අතරතුර, නියෝජ්ය අමාත්ය අනිල් ජයන්ත මහතා වෙනත් විග්රහයක් සිදු කිරීම නිසා ජනතාව දැඩි ලෙස නොමඟ ගොස් ඇති බව ඔහු ප්රකාශ කළේය.
මුදල් අමාත්යාංශ ලේකම්වරයා පවසන පරිදි මෙම ගැටලුව ජනවාරි මාසයේදී හඳුනා ගත්තේ නම්, ඒ පිළිබඳ පරීක්ෂණ පැවැත්වීමට කමිටුවක් පත් කිරීමට මාර්තු මාසය දක්වා කල් ගත්තේ ඇයිද යන්න ගැටලු සහගත බව සජිත් ප්රේමදාස මහතා ප්රශ්න කරයි. එමෙන්ම, රජයේ මූල්ය පාලනය පිළිබඳ ප්රධාන වගකීම ඇති පාර්ලිමේන්තුවට මෙම දැවැන්ත මූල්ය සොරකම පිළිබඳව මාස කිහිපයක් තිස්සේ දැනුම් නොදීම බරපතළ වරදක් බව ඔහු අවධාරණය කළේය.
තවද, මෙම වංචාව ඉන්දියාව සහ ඔස්ට්රේලියාව සමඟ සිදුකළ ගනුදෙනුවලට සම්බන්ධ බවට පළවන වාර්තාවල සත්යතාව රජය වහාම රටට හෙළි කළ යුතු බවද ඔහු ඉල්ලා සිටියේය. ජනතාවට තොරතුරු දැනගැනීමේ අයිතිය ඇති බැවින්, මෙම කරුණ මාස ගණනාවක් සඟවා තැබීමට හේතුව රජය පැහැදිලි කළ යුතු බව විපක්ෂ නායකවරයා වැඩිදුරටත් සඳහන් කළේය.
