ශ්රී ලංකාවේ සෞදි අරාබි රාජධානියේ තානාපති කලීඩ් හමූද් නසාර් අල්කහ්තානි මහතා සිය ධූර කාලය අවසන් කරමින් ඊයේ (16) අරලියගහ මන්දිරයේදී අග්රාමාත්ය ආචාර්ය හරිනි අමරසූරිය මහත්මියව හමුවිය. මෙම හමුවේදී තානාපතිවරයා සිය සමුගැනීමේ නිල පණිවුඩය අග්රාමාත්යවරිය වෙත දන්වා සිටියේය.
ශ්රී ලංකාව සහ සෞදි අරාබිය අතර පවතින දිගුකාලීන මිත්රත්වය සහ විවිධ ක්ෂේත්ර ඔස්සේ පවතින සහයෝගීතාව පිළිබඳව අග්රාමාත්යවරිය සිය ප්රසාදය පළ කළාය. විශේෂයෙන්ම ‘දිට්වා’ සුළි කුණාටු බලපෑමෙන් පසු සෞදි අරාබි රජය විසින් ශ්රී ලංකාව වෙත කඩිනමින් ලබාදුන් මානුෂීය ආධාර වෙනුවෙන් ඇය සිය කෘතඥතාව පිරිනැමුවාය. එමෙන්ම සෞදි රජයේ අරමුදල් හරහා මෙරට අධ්යාපන ක්ෂේත්රය නංවාලීමට ලබාදෙන සහයෝගය ද අග්රාමාත්යවරියගේ ඇගයීමට ලක්විය.
තම ධූර කාලය තුළ ශ්රී ලංකා රජයෙන් ලැබුණු සහයෝගය සම්බන්ධයෙන් ස්තූතිය පුද කළ තානාපතිවරයා, ඉදිරි වසරවලදී ද සෞදි අරාබි රාජධානියේ අඛණ්ඩ සහයෝගය ශ්රී ලංකාවට හිමිවන බවට සහතික විය. දෙරටේම අන්යෝන්ය යහපත උදෙසා පවත්නා ද්විපාර්ශ්වික සබඳතා තවදුරටත් ශක්තිමත් කර ගැනීමට සහ සහයෝගීතාව පුළුල් කිරීමට දෙපාර්ශ්වයම එකඟතාව පළ කළහ.
මෙම අවස්ථාව සඳහා සෞදි අරාබි තානාපති කාර්යාලයේ නියෝජ්ය තානාපති යසීර් අල්හසෙමි මහතා, තානාපති ලේකම් ඒ.සී.ඒ. මෂාහිර් මහතා මෙන්ම අග්රාමාත්ය ලේකම් ප්රදීප් සපුතන්ත්රි මහතා සහ විදේශ කටයුතු, විදේශ රැකියා සහ සංචාරක අමාත්යාංශයේ නිලධාරීන් පිරිසක් සහභාගී වූහ.
