මැදපෙරදිග පවතින යුදමය වාතාවරණය හේතුවෙන් කොටස් වෙළඳපොළ කෙරෙහි ආයෝජක විශ්වාසය පළුදු වී ඇති පසුබිමක, සමාගම්වලට සිය මූලික මහජන කොටස් නිකුත් කිරීමේ (IPO) ප්රමාණය සංශෝධනය කිරීම සඳහා පනවා තිබූ දැඩි නීති ලිහිල් කිරීමට ඉන්දීය වෙළඳපොළ නියාමන ආයතනය (SEBI) තීරණය කර තිබේ. රොයිටර් පුවත් සේවය දුටු ඊමේල් පණිවුඩයකට අනුව, මින් ඉදිරියට සමාගමකට සිය මුල් සැලසුමට වඩා 50%ක් දක්වා IPO ප්රමාණය අඩු කිරීමට අවස්ථාව ලැබෙන අතර ඒ සඳහා නැවත අලුතින් ලිපි ලේඛන ඉදිරිපත් කිරීමේ (Refiling) අවශ්යතාවක් පැන නොනගී. වත්මන් නීතිවලට අනුව IPO ප්රමාණය 20%කට වඩා වෙනස් වන්නේ නම් අනිවාර්යයෙන්ම නැවත ලියාපදිංචි වීමේ ලේඛන ඉදිරිපත් කළ යුතු වුවද, පවතින අසාමාන්ය තත්ත්වය සලකා මෙම සහනය ලබා දී ඇත.
මෙම නව නීති සංශෝධනය 2026 සැප්තැම්බර් 30 වනදා දක්වා බලපැවැත්වෙන බව වාර්තා වන අතර, යුද්ධය නිසා ඇති වී තිබෙන ආර්ථික අවිනිශ්චිතතාව මධ්යයේ ආයෝජන සම්පත් රැස්කර ගැනීමට සමාගම් මුහුණ දෙන අභියෝග මෙයට ප්රධාන හේතුව වී තිබේ. ඉරාන යුද්ධය හේතුවෙන් තෙල් මිල ඉහළ යාම සහ විදේශීය ආයෝජකයින් ඉන්දීය වෙළඳපොළෙන් ඉවත් වීම නිසා බොහෝ සමාගම් සිය කොටස් නිකුත් කිරීමේ සැලසුම් තාවකාලිකව අත්හිටුවා තිබුණි. මෙම ලිහිල් කිරීම හරහා වෙළඳපොළේ පවතින දැඩි පීඩනය යම් දුරකට අවම කර ගැනීමටත්, මූල්ය ක්රියාවලිය වඩාත් වේගවත් කිරීමටත් අපේක්ෂා කෙරේ.
