“සමගි කැපිටල් (පුද්ගලික) සමාගම” (Samagi Capital (Private) Limited) නමැති ආයතනය ශ්රී ලංකාව තුළ කොටස් තැරැව්කාර හෝ කොටස් වෙළෙඳ කටයුතු සිදු කිරීම සඳහා බලපත්රලාභී ආයතනයක් නොවන බව ශ්රී ලංකා සුරැකුම්පත් සහ විනිමය කොමිෂන් සභාව (SEC) නිවේදනයක් නිකුත් කරමින් අවධාරණය කරයි. එම සමාගම සතුව කොටස් තැරැව්කාර වෙළෙඳ බලපත්රයක් (Broker Dealer License) ඇති බව අඟවමින් සමාජ මාධ්ය ඔස්සේ සංසරණය වන සහතික පත්රය සම්පූර්ණයෙන්ම ව්යාජ සහ වංචනික එකක් බවත්, එය කොමිෂන් සභාව විසින් නිකුත් කරන ලද්දක් නොවන බවත් එම නිවේදනයේ වැඩිදුරටත් දැක්වේ.
මහජනතාව නොමඟ යවමින් සිදුකරන මෙම මූල්ය වංචාව පිළිබඳව ආයෝජකයින් දැඩි ලෙස විමසිලිමත් විය යුතු බව SEC ආයතනය පෙන්වා දෙයි. කොළඹ කොටස් වෙළෙඳපොළෙහි (CSE) ගනුදෙනු කිරීමේ අරමුණින්, “සමගි කැපිටල්” සමාගම වෙත හෝ ඊට අනුබද්ධ කිසිදු බැංකු ගිණුමකට මුදල් තැන්පත් කිරීමෙන් වළකින ලෙස සුරැකුම්පත් සහ විනිමය කොමිෂන් සභාව මහජනතාවගෙන් තරයේ ඉල්ලා සිටී.
ආයෝජකයින්ගේ ධනය සුරක්ෂිත කරගැනීම සඳහා පහත කරුණු පිළිබඳව සැලකිලිමත් වන ලෙස කොමිෂන් සභාව දැනුම් දෙයි:
ඕනෑම කොටස් වෙළෙඳපොළ ගනුදෙනුවක් සිදු කළ යුත්තේ සුරැකුම්පත් සහ විනිමය කොමිෂන් සභාවේ නිසි බලපත්ර සහිත කොටස් තැරැව්කාර සමාගම් හරහා පමණි.
යම් ආයතනයක් බලපත්රලාභී ආයතනයක් දැයි සැකයක් ඇත්නම්, ශ්රී ලංකා සුරැකුම්පත් සහ විනිමය කොමිෂන් සභාවේ (www.sec.gov.lk
) හෝ කොළඹ කොටස් වෙළෙඳපොළේ (www.cse.lk
) නිල වෙබ් අඩවි වෙත පිවිස ඒ පිළිබඳව නිවැරදි තොරතුරු තහවුරු කරගත යුතුය.
ආයෝජකයන්ගේ ආරක්ෂාව තහවුරු කිරීම තම ආයතනයේ පරම වගකීමක් බව පෙන්වා දෙන SEC, මෙවැනි ව්යාජ සමාජ මාධ්ය ප්රචාරයන්ට හසුනොවන ලෙස මහජනතාවට වැඩිදුරටත් අනතුරු අඟවයි.
