ලංකා වාණිජ මණ්ඩලය විසින් දෙවන වරටත් සංවිධානය කරන ලද ශ්රී ලංකා දේශගුණික සමුළුව 2026 (Sri Lanka Climate Summit 2026) අද (09) පෙරවරුවේ කොළඹ ටාජ් සමුද්රා හෝටලයේදී සාර්ථකව ආරම්භ කෙරිණි. පරිසර අමාත්ය වෛද්ය දම්මික පටබැඳි මහතාගේ ප්රධානත්වයෙන් පැවැත්වුණු මෙවර සමුළුව “අවදානමෙන් අවස්ථාවට: ශ්රී ලංකාවේ වර්ධන මාවතට දේශගුණික ක්රියාකාරකම් බද්ධ කිරීම” (From Risk to Opportunity: Mainstreaming Climate Action into Sri Lanka’s Growth Story) යන තීරණාත්මක තේමාව යටතේ පවත්වනු ලැබීය.
එහිදී සමුළුව අමතමින් “ශ්රී ලංකාව ආයෝජන සඳහා දේශගුණික වශයෙන් සූදානම්ද?” යන සංවාදය මෙහෙයවූ අමාත්යවරයා, තාක්ෂණික සූදානම සහ තිරසාර ආර්ථික වර්ධනය අතර පවතින පරතරය පියවීම සඳහා ප්රතිපත්ති සම්පාදකයින්, මූල්ය ආයතන සහ කර්මාන්ත නායකයින් අතර ඉහළ මට්ටමේ සාකච්ඡාවක් ඇති කිරීමේ හදිසි අවශ්යතාව අවධාරණය කළේය.
මහා පරිමාණ දේශගුණික ආයෝජන ප්රවර්ධනය කිරීමට සමගාමීව, පරිසර අමාත්යාංශය සහ මධ්යම පරිසර අධිකාරිය එක්ව බිම් මට්ටමේ දේශගුණික ඔරොත්තු දීමේ හැකියාව සහ චක්රීය ආර්ථික මුලපිරීම් ද ශක්තිමත් කරමින් සිටී. මෙම ප්රයත්නයන් ඉස්මතු කරමින්, ශ්රී ලංකාවේ විධිමත් නොවන (බාහිර) අපද්රව්ය එකතු කරන්නන් ඇගයීමට ලක් කිරීම සහ ඔවුන්ගේ ධාරිතා සංවර්ධනය සඳහා වන ජාතික සහ පළාත් මට්ටමේ වැඩසටහන් සාර්ථකව ක්රියාවට නැංවීම පිළිබඳව මෙහිදී විශේෂ අවධානය යොමු විය. විශේෂයෙන්ම මෙම විධිමත් නොවන අපද්රව්ය අංශයේ නිරතවූවන්ගේ සුභසාධනය, ආරක්ෂාව සහ ඔවුන්ව ජාතික හරිත ආර්ථිකයට බද්ධ කරගනිමින් සියලු දෙනා ඇතුළත් කරගත් ප්රාදේශීය පාරිසරික කළමනාකරණයක් සිදු කිරීමේ වැදගත්කම දීර්ඝ ලෙස සාකච්ඡා කෙරිණි.
දේශගුණික බලපෑම් අවම කිරීමේ සුවිශේෂී පියවරක් ලෙස, රජය විසින් කාර්මික අංශයේ විමෝචන අවම කිරීමේ ඉලක්කය 13% ක කැපවීමක් දක්වා දෙගුණ කිරීමට ප්රතිපත්තිමය තීරණයක් ගෙන තිබේ. 2030 වන විට ශ්රී ලංකාවේ පුනර්ජනනීය බලශක්ති උත්පාදනය 70% දක්වා ළඟා කර ගැනීමේ සහ 2050 වන විට ශ්රී ලංකාව සම්පූර්ණයෙන්ම කාබන් මධ්යස්ථ (Carbon Neutrality) රටක් බවට පත් කිරීමේ සමස්ත දැක්ම සහ එහි මූලික පදනම පරිසර අමාත්යවරයා විසින් මෙහිදී නිල වශයෙන් අනාවරණය කරනු ලැබීය.
