මැදපෙරදිග කලාපයේ පවතින යුදමය වාතාවරණය හේතුවෙන් ශ්‍රී ලංකාව මුහුණ දී ඇති අභියෝග සහ ඒ පිළිබඳ මෙරට ස්ථාවරය ජනාධිපති අනුර කුමාර දිසානායක මහතා විසින් ඇමෙරිකානු දූත පිරිසක් වෙත ඉදිරිපත් කර තිබේ. ඇමෙරිකා එක්සත් ජනපදයේ දකුණු හා මධ්‍යම ආසියාව සඳහා වූ විශේෂ නියෝජිත සර්ජියෝ ගෝර් (Sergio Gor) මහතා ඇතුළු පිරිස ඊයේ (මාර්තු 19) ජනාධිපති කාර්යාලයේදී ජනාධිපතිවරයා හමුවූ අවස්ථාවේදී මෙම කරුණු සාකච්ඡා කෙරිණි.
ගෝලීය වශයෙන් පවතින යුදමය තත්ත්වයන් හමුවේ ශ්‍රී ලංකාවේ බලශක්ති සුරක්ෂිතතාව සහ ආර්ථිකයට එල්ල විය හැකි බලපෑම් පිළිබඳව ජනාධිපතිවරයා මෙහිදී ඇමෙරිකානු නියෝජිත පිරිස දැනුවත් කළේය. මැදපෙරදිග අර්බුදය හමුවේ ශ්‍රී ලංකාව අනුගමනය කරන මධ්‍යස්ථ සහ සාමකාමී ප්‍රතිපත්තිය පිළිබඳව ද මෙහිදී අදහස් හුවමාරු විය.
එමෙන්ම ඇමෙරිකා එක්සත් ජනපදය හා ශ්‍රී ලංකාව අතර පවතින ද්විපාර්ශ්වික සබඳතා තවදුරටත් ශක්තිමත් කර ගැනීම සහ ආර්ථික සහයෝගීතාව වර්ධනය කර ගැනීම සම්බන්ධයෙන් ද දෙපාර්ශ්වය දීර්ඝ වශයෙන් සාකච්ඡා කළහ. ජනාධිපති ලේකම් ආචාර්ය නන්දික සනත් කුමාරනායක සහ මුදල් අමාත්‍යාංශයේ ලේකම් ආචාර්ය හර්ෂණ සූරියප්පෙරුම යන මහත්වරු ඇතුළු ඉහළ පෙළේ නිලධාරීන් පිරිසක් ද මෙම අවස්ථාවට එක්ව සිටියහ.
