ළමුන්ට එරෙහි හිංසනය අවසන් කිරීම පිළිබඳ දකුණු ආසියානු අමාත්ය සමුළුව (South Asia Ministerial Conference on Ending Violence against Children – EVAC) අද (23) කොළඹදී ආරම්භ විය. එහි සමාරම්භක අවස්ථාවට එක්වෙමින් අග්රාමාත්ය ආචාර්ය හරිනි අමරසූරිය මහත්මිය සඳහන් කළේ ළමා ආරක්ෂාව යනු එක් ක්ෂේත්රයකට පමණක් සීමා වූ කරුණක් නොව, සියලු සංවර්ධන, පාලන සහ සමාජ රාමු තුළ අන්තර්ගත ජාතික ප්රමුඛතාවයක් බවයි.
දෙදිනක් පුරා පැවැත්වෙන මෙම කලාපීය සමුළුව හරහා දකුණු ආසියාව තුළ ළමුන්ට එරෙහිව සිදුවන හිංසනය තුරන් කිරීම සඳහා අවශ්ය දේශපාලනික පසුබිම ශක්තිමත් කිරීම, මෙතෙක් ලබාගෙන ඇති ප්රගතිය සමාලෝචනය කිරීම සහ ඉදිරි ක්රියාමාර්ග පිළිබඳව විශේෂ අවධානයක් යොමු කෙරේ.
පාසල් පද්ධතියේ වැදගත්කම පිළිබඳව අදහස් දක්වමින් අග්රාමාත්යවරිය පැවසුවේ, රටක අධ්යාපන පද්ධතිය ළමුන්ට දැනුම ලබා දෙන ස්ථානයකට පමණක් සීමා නොවිය යුතු බවයි. පාසල් යනු හානිකර තත්ත්වයන් කල්තියා හඳුනා ගනිමින්, මනෝසමාජීය සහාය ලබාදෙමින් දරුවන්ගේ ආරක්ෂාව සඳහා කැපවෙන වැදගත් ස්ථාන විය යුතු බවත්, උපදේශන සේවා ඇතුළු ළමා ආරක්ෂණ පද්ධති පාසල් මට්ටමින් ශක්තිමත් කිරීමට රජය කැපවී සිටින බවත් ඇය අවධාරණය කළාය.
ළමා විවාහ, ළමා ශ්රමය සූරාකෑම, දත්ත විෂමතා සහ සමාජ මාධ්ය හරහා සිදුවන අපයෝජන ඇතුළු නැගී එන නව අභියෝගවලට විසඳුම් සෙවීමේදී කලාපීය රටවල් අතර අත්දැකීම් හුවමාරු කර ගැනීම සහ සාමූහික ක්රියාමාර්ග අත්යවශ්ය බව ද අග්රාමාත්යවරිය වැඩිදුරටත් කියා සිටියාය.
සාක් සංවිධානය, යුනිසෙෆ් ආයතනය, ලෝක සෞඛ්ය සංවිධානය සහ එක්සත් ජාතීන්ගේ නියෝජිතයින්ගේ සහභාගීත්වයෙන් පැවැත්වෙන මෙම සමුළුවට කලාපයේ අමාත්යවරුන්, ජ්යෙෂ්ඨ රාජ්ය නිලධාරීන් සහ සංවර්ධන හවුල්කරුවන් රැසක් එක්ව සිටිති.
