දකුණු කොරියාවේ ප්රධාන කොටස් වෙළඳපොළ දර්ශකය වන KOSPI දර්ශකය, විදේශීය ආයෝජකයින්ගේ කොටස් අලෙවි කිරීම, ඇමරිකානු පොලී අනුපාත සහ ලෝක වෙළඳපොළේ තෙල් මිල වෙනස්වීම් හමුවේ දැඩි උච්චාවචනයකට (Roller-coaster run) ලක්වෙමින් පවතී. මෑතකදී KOSPI දර්ශකය අගයන් 8,000 සීමාව පසුකර යාමෙන් අනතුරුව, පසුගිය දින කිහිපයේදී දරුණු ලෙස පහත වැටුණු අතර, මැයි 21 වැනිදා (අද) දින සැසිය තුළදී නැවතත් සියයට 8.42ක (8.42%) දැවැන්ත ප්රකෘතිමත් වීමක් පෙන්වමින් අගයන් 7,815.59ක් දක්වා ඉහළ ගියේය. KOSDAQ දර්ශකය ද සියයට 4.73කින් ඉහළ ගොස් ඇති අතර, වෙළඳපොළ ආරම්භයේදීම දර්ශක දෙකම සියයට 5කට වඩා ඉහළ යාම නිසා ස්වයංක්රීයව වෙළඳාම තාවකාලිකව නතර කිරීමේ ‘සර්කිට් බ්රේකර්’ (Circuit breaker) පද්ධතිය ක්රියාත්මක කිරීමට ද සිදුවිය.
මෙම හදිසි වෙළඳපොළ පිබිදීමට හේතු වී ඇත්තේ ඇමරිකානු – ඉරාන සාම සාකච්ඡා පිළිබඳ බලාපොරොත්තු හමුවේ ලෝක තෙල් මිල පහත වැටීම සහ ඇමරිකානු බැඳුම්කර ප්රතිලාභ ස්ථාවර වීමයි. මීට අමතරව, නිවිඩියා (Nvidia) සමාගමේ ඉහළ ආදායම් වාර්තා සහ සැම්සුන් ඉලෙක්ට්රොනික්ස් (Samsung Electronics) සමාගමේ පාලනාධිකාරිය සහ සේවක සංගමය අතර ඇති වූ තාවකාලික එකඟතාව ද කොරියානු අර්ධ සන්නායක (Semiconductor) කොටස් මිල ඉහළ යාමට තදින්ම බලපෑවේය. කෙසේ වුවද, වෙළඳපොළේ පවතින අවදානම මැන බලන KOSPI ප්ලාවිත දර්ශකය (VKOSPI) සාමාන්ය අගය වන 18.8 සිට 65.5 දක්වා ඉහළ ගොස් තිබීම ආයෝජකයින් මුහුණ දෙන දැඩි අවදානම පෙන්නුම් කරයි.
වෙළඳපොළ උච්චාවචනය වීමත් සමඟ සිල්ලර ආයෝජකයින් ණය මුදල් ලබාගෙන සිදුකරන ආයෝජන (Margin loan balances) වොන් ට්රිලියන 36.6ක වාර්තාගත ඉහළම අගයකට පැමිණ ඇත. මේ හේතුවෙන්, කොටස් මිල පහත වැටීමේදී තැරැව්කාර සමාගම් විසින් ආයෝජකයින්ගේ කොටස් බලහත්කාරයෙන් විකුණා දැමීමේ (Forced selling) ප්රවණතාව දින දෙකක් තුළ වොන් බිලියන 150ක් දක්වා ඉහළ ගොස් තිබේ. මෙම දැඩි රත්වුණු ආයෝජන වටපිටාව සැලකිල්ලට ගනිමින්, සැම්සුන් සහ SK Hynix සමාගම් පාදක කරගනිමින් හඳුන්වා දීමට නියමිතව තිබූ 2x ලෙවරේජ් (Leveraged ETFs) මූල්ය නිෂ්පාදන ප්රවර්ධනය කිරීම සීමා කරන ලෙස කොරියානු මූල්ය අධීක්ෂණ සේවාව (FSS) සහ මූල්ය සේවා කොමිෂන් සභාව (FSC) විසින් වත්කම් කළමනාකරණ සමාගම් වෙත දැඩි ලෙස අවවාද කර ඇත.
