ශ්රී ලංකාවේ දකුණු කොරියානු තානාපතිනිය වන මියොන් ලී (Miyon Lee) මහත්මිය සහ ප්රවාහන, මහාමාර්ග හා නාගරික සංවර්ධන අමාත්ය බිමල් රත්නායක මහතා අතර විශේෂ සාකච්ඡාවක් ඊයේ (09) ශ්රී ලංකා පාර්ලිමේන්තු සංකීර්ණයේ සභානායක කාර්යාල පරිශ්රයේදී පැවැත්විණි.
දෙරට අතර ද්විපාර්ශ්වික සබඳතා වර්ධනය කිරීම, ආයෝජන අවස්ථා පුළුල් කිරීම සහ ඉදිරි සංවර්ධන ව්යාපෘති සම්බන්ධයෙන් මෙහිදී දීර්ඝ ලෙස සාකච්ඡා කෙරිණි.
ණය ප්රතිව්යුහගතකරණය සාර්ථකව අවසන්
කොරියානු ජනරජය සහ ශ්රී ලංකාව අතර පැවති ණය ප්රතිව්යුහගතකරණ ක්රියාවලිය මේ වන විට සාර්ථකව අවසන් කර ඇති බව තානාපතිනිය මෙහිදී නිල වශයෙන් පෙන්වා දුන්නාය. එමෙන්ම ශ්රී ලංකාවේ නව ආයෝජන අවස්ථා සඳහා කොරියානු සමාගම් ඉහළ උනන්දුවක් දක්වන බව ද ඇය සඳහන් කළාය.
මාර්ග සංඥා පද්ධති ඩිජිටල්කරණයට සහාය
ප්රවාහන, මහාමාර්ග සහ නාගරික සංවර්ධන අමාත්යාංශයේ නිලධාරීන්ට, මෙරට මාර්ග සංඥා පද්ධති ක්රියාකාරකම් ඩිජිටල්කරණය කිරීමට අදාළ ශක්යතා සංවර්ධනය සඳහා දකුණු කොරියාව සමඟ එක්ව කටයුතු කිරීමේ හැකියාව සොයා බැලීමට ද මෙහිදී එකඟතාව පළ විය.
ජාත්යන්තර ICAPP සමුළුව ලංකාවේ
මෙම වසරේ නොවැම්බර් මාසයේදී ශ්රී ලංකාවේ පැවැත්වීමට නියමිත ජාත්යන්තර ආසියානු දේශපාලන පක්ෂ සමුළුවේ (ICAPP) සංවිධාන කටයුතු පිළිබඳව ද මෙහිදී විශේෂ අවධානයක් යොමු විය. ඊට අදාළව ICAPP සංවිධානයේ නියෝජිතයෙකු නුදුරේදීම ශ්රී ලංකාවට පැමිණ නිලධාරීන් හමුවීමට නියමිත බව තානාපතිනිය පැවසුවාය.
ශ්රී ලංකාව සහ දකුණු කොරියාව අතර රාජ්ය තාන්ත්රික සබඳතාවලට ලබන වසරට (2027) වසර 50ක් සපිරෙන බැවින්, එම 50 වැනි වසර සැමරුම් වැඩසටහන් උත්කර්ෂවත් අන්දමින් පැවැත්වීම පිළිබඳව ද දෙපාර්ශ්වය අතර අදහස් හුවමාරු කර ගැනිණි.
