රුපියල් මිලියන 501ක වියදමින් අභිනවයෙන් ඉදිකළ ශ්රවණාගාරය ඇතුළු නවීකරණය කළ ජීව වෛද්ය ඉංජිනේරු සේවා මධ්යස්ථානය සෞඛ්ය හා ජනමාධ්ය නියෝජ්ය ඇමැති වෛද්ය නලින්ද ජයතිස්ස මහතාගේ ප්රධානත්වයෙන් අද (16) ජනතා අයිතියට පත් කෙරේ. කොරියා ජාත්යන්තර සෞඛ්ය සේවා පදනම (KOFIH) මගින් මෙම ඉදිකිරීම් සිදු කර ඇත.
මෙම අවස්ථාවේදීම රුපියල් මිලියන 228ක් වැය කරමින් මධ්යම, උතුරු මැද, උතුර, නැගෙනහිර, ඌව සහ දකුණු පළාත් සභා යටතේ ස්ථාපිත කර ඇති ජීව වෛද්ය ඉංජිනේරු සේවා ඒකක වෙත ඉංජිනේරු මෙවලම්, වෛද්ය පරීක්ෂණ උපකරණ සහ අලුත්වැඩියා මෙවලම් බෙදා දීමද සිදු කිරීමට නියමිතය. එම උපකරණ සඳහා වැය කර ඇති මුදලද කොරියා ජාත්යන්තර සෞඛ්ය සේවා පදනම මගින් සපයා ඇත.
පුළුල් කර නවීන පහසුකම් සහිතව සිදු කළ මෙම නවීකරණය හරහා මෙරට ජනතාවට ජීව වෛද්ය ඉංජිනේරු සේවා ලබා දීමේ කාර්යක්ෂමතාව සහ ඵලදායීතාව ඉහළ නැංවීමට හැකි වේ. ප්රමාණවත් ඉඩ පහසුකම්, වැඩිදියුණු කළ තාක්ෂණික සහ සැපයුම් පහසුකම්වලින් සමන්විත මෙම මධ්යස්ථානය, නිලධාරීන්, කාර්මික ශිල්පීන් සහ ඉංජිනේරුවන් පුහුණු කිරීම සඳහා නවීන ශ්රවණාගාරයක් ද සහිතව ඉදිකර ඇත.
ශ්රී ලංකාවේ ජීව වෛද්ය ඉංජිනේරු සේවයේ ධාරිතාව ගොඩනැගීම සඳහා කොරියා ජාත්යන්තර සෞඛ්ය සේවා පදනම අරමුදල් සපයයි. මෙම ව්යාපෘතිය යටතේ වෛද්ය උපකරණ ඉන්වෙන්ටරි කළමනාකරණ පද්ධතියක් ස්ථාපිත කිරීම, ජංගම වැඩහල් වාහන සැපයීම සහ සේවක ධාරිතා වර්ධනය සඳහා පශ්චාද් උපාධි සහ කෙටි තාක්ෂණික පාඨමාලා ක්රියාත්මක කිරීම වැනි සංවර්ධන ක්රියාවලි රැසක් ක්රියාත්මක වේ.
මෙම සමාරම්භක අවස්ථාව සඳහා සෞඛ්ය නියෝජ්ය අමාත්ය වෛද්ය හංසක විජේමුණි, අමාත්යාංශයේ ලේකම් විශේෂඥ වෛද්ය අනිල් ජාසිංහ, ශ්රී ලංකාවේ කොරියානු තානාපතිනි මියොන් ලී, කොරියා ජාත්යන්තර සෞඛ්ය සේවා පදනමේ මහලේකම් ඇතුළු රාජ්ය නිලධාරීන් සහ කොරියානු ආයතනයන්හි නියෝජිතයන් පිරිසක් සහභාගි වීමට නියමිතය.
