පොදු මගී ප්රවාහන සේවයේ යෙදෙන ශ්රී ලංගම සහ පෞද්ගලික බස් රථවල ගමන් ගන්නා මගීන්ගෙන් නියමිත ගාස්තුවට වඩා වැඩිපුර මුදල් අය කරන බවට ලැබුණු පැමිණිලි සැලකිල්ලට ගනිමින් ශ්රී ලංකා පොලිසිය සහ ජාතික ගමනාගමන කොමිෂන් සභාව ඒකාබද්ධව විශේෂ පරීක්ෂණ මාලාවක් ආරම්භ කර තිබේ. පසුගිය දිනවල සිදු කළ වැටලීම්වලදී මගීන්ගෙන් නීති විරෝධී ලෙස වැඩිපුර මුදල් ලබාගත් බස් රථ රැසක් අනාවරණය කර ගැනීමට නිලධාරීහු සමත් වූහ. මෝටර් වාහන පනතේ 173 වගන්තියට අනුව බස් රථ ධාවන බලපත්රයේ සඳහන් නියමිත ගාස්තුවට වඩා වැඩි මුදලක් ඉල්ලීම හෝ භාර ගැනීම දඬුවම් ලැබිය හැකි වරදකි.
වැඩිපුර ගාස්තු අය කරන පුද්ගලයන්ට එරෙහිව මෝටර් වාහන පනතට අමතරව දණ්ඩ නීති සංග්රහය යටතේ එන බලෙන් ලබා ගැනීම, වංචා කිරීම සහ සාපරාධී සාවද්ය පරිහරණය යන බරපතළ වගන්ති ප්රකාරව නීතිය ක්රියාත්මක කිරීමට පොලිසිය තීරණය කර ඇත. මේ හේතුවෙන් මගී ප්රවාහන බස් රථවල ගමන් කිරීමේදී නියමිත ප්රවාහන ගාස්තුවට වඩා සතයක් හෝ වැඩිපුර නොගෙවන ලෙස පොලිසිය මහජනතාවගෙන් ඉල්ලා සිටී. යම් හෙයකින් එවැනි අසාධාරණයක් සිදුවන්නේ නම් වහාම ක්රියාත්මක වී 118 හෝ 119 යන හදිසි ඇමතුම් අංක ඔස්සේ පොලිසිය දැනුවත් කරන ලෙස ද දන්වා ඇත.
මගීන් සූරාකමින් අසාධාරණ ලෙස මුදල් උපයන බස් රථ හිමියන්ට, රියදුරන්ට සහ කොන්දොස්තරවරුන්ට එරෙහිව දැඩි නෛතික ක්රියාමාර්ග ගැනීම හරහා මගී ජනතාවට සහනයක් සැලසීම මෙම මෙහෙයුමේ ප්රධාන අරමුණයි. මගීන්ට ද තමන් ගෙවිය යුතු නියමිත ගාස්තුව පිළිබඳව විමසිලිමත් වන ලෙසත්, අසාධාරණයට එරෙහිව බියෙන් තොරව පැමිණිලි ඉදිරිපත් කරන ලෙසත් පොලිස් මූලස්ථානය අවධාරණය කරයි.
