පුද්ගලයන් ලියාපදිංචි කිරීමේ දෙපාර්තමේන්තුවේ නිල පණිවිඩයක ස්වරූපයෙන් WhatsApp හරහා පැමිණෙන නවතම මූල්ය වංචාවක් පිළිබඳව ශ්රී ලංකා පරිගණක හදිසි ප්රතිචාර සංසදය (CERT) මහජනතාව දැනුවත් කරයි. වංචාකරුවන් ඉතා නීත්යනුකූල ලෙස මෙම පණිවිඩ සකස් කර ඇති බැවින්, ඕනෑම අයෙකු මීට පහසුවෙන් ගොදුරු වීමේ දැඩි අවදානමක් පවතී.
අදාළ ව්යාජ පණිවිඩවල පුද්ගලයාගේ නිවැරදි නම, හැඳුනුම්පත් අංකය සහ ලිපිනය සඳහන් කර ඇති බැවින්, මගඩියක් බව හඳුනා ගැනීම අපහසු වේ. “ජාතික හැඳුනුම්පත් තොරතුරු යාවත්කාලීන කිරීමට පැමිණෙන්න” යැයි දන්වමින් ඔවුන් එම පණිවිඩය අවසානයේ සඳහන් කරන්නේ, සහභාගී නොවන්නේ නම් හැඳුනුම්පතට අදාළ සේවාවන් තාවකාලිකව අත්හිටුවනු ලබන බවයි. බොහෝ දෙනෙකු නියමිත වේලාවට මොහොතකට පෙර මෙම පණිවිඩ ලැබීම හේතුවෙන් බියට පත්වී, එහි සඳහන් ව්යාජ දුරකතන අංකවලට ඇමතුම් ලබා ගනී.
මෙම අවස්ථාව ප්රයෝජනයට ගන්නා වංචාකරුවන්, අයදුම්පතක් පිරවීමේ මුවාවෙන් වින්දිතයන් ලවා බැංකු ගිණුම්වලට අදාළ OTP කේත ඇතුළු රහස්ය තොරතුරු ලබාගෙන, ඔවුන්ගේ බැංකු ගිණුම් හිස් කරයි.
ශ්රී ලංකා CERT ආයතනය අවධාරණය කරන්නේ, පුද්ගලයන් ලියාපදිංචි කිරීමේ දෙපාර්තමේන්තුව කිසිදු විටෙක WhatsApp හරහා තොරතුරු සත්යාපනය කිරීමක් සිදු නොකරන බවයි. එබැවින් මෙවැනි පණිවිඩවල ඇති වෙබ් අඩවි ලිපින (Links) වෙත පිවිසීමෙන් හෝ ලබා දී ඇති දුරකතන අංකවලට ඇමතීමෙන් වහාම වැළකී සිටින ලෙසත්, තමන්ගේ පුද්ගලික හෝ බැංකු රහස්ය තොරතුරු කිසිදු බාහිර පාර්ශ්වයකට ලබා නොදීමටත් වග බලා ගන්නා ලෙස මහජනතාවගෙන් කාරුණිකව ඉල්ලා සිටී.
