අපනයනකරුවන්ට වඩාත් පහසුවෙන් අපනයන කටයුතු සිදු කළ හැකි පරිසරයක් නිර්මාණය කිරීම සඳහා රේගු පහසුකම් සහ නවීකරණ කටයුතු කඩිනමින් සිදු කරන ලෙස ජනාධිපති ලේකම් ආචාර්ය නන්දික සනත් කුමානායක මහතා රේගු බලධාරීන්ට උපදෙස් දී තිබේ. ජාතික අපනයන සංවර්ධන සැලැස්ම (2026-2030) ක්රියාවට නැංවීමට සමගාමීව රේගුවේ සිදු කළ යුතු නව්යකරණ වැඩපිළිවෙළ සහ අපනයනකරුවන් දිරිගැන්වීම පිළිබඳව සාකච්ඡා කිරීම සඳහා ජනාධිපති කාර්යාලයේදී පැවැති රැස්වීමකදී ඔහු මේ බව සඳහන් කළේය.
මෙම සාකච්ඡාවේදී ගනු ලැබූ ප්රධාන තීරණ සහ සාකච්ඡා වූ කරුණු අතර අපනයන බහලුම් පරීක්ෂා කරන ‘Export Facilitation Centre’ හි ධාරිතාව සහ පහසුකම් වැඩි දියුණු කර අපනයනකරුවන්ට කටයුතු කිරීම පහසු කිරීමට පියවර ගන්නා ලෙස රේගුවට උපදෙස් ලබා දීම ප්රධාන වේ. දැනට රේගුවේ ක්රියාත්මක වන TIEP ක්රියාවලිය සමාලෝචනය කර, මෙතෙක් අපනයන ක්ෂේත්රයට යොමු නොවූ කුඩා හා මධ්ය පරිමාණ ව්යවසායකයන් අපනයන ක්ෂේත්රයට සම්බන්ධ කර ගැනීමේ විශේෂ වැඩපිළිවෙළක් සකස් කිරීමේ අවශ්යතාව ද අවධාරණය කෙරිණි.
අපනයන කටයුතු සඳහා රේගු සේවා විමධ්යගත කිරීමේ හැකියාව පරීක්ෂා කෙරුණු අතර, යාපනය ප්රදේශයේ රේගු අපනයන මධ්යස්ථානයක් ආරම්භ කිරීම කෙරෙහි ද අවධානය යොමු විය. ඊ-වාණිජ්ය (e-commerce) මඟින් අපනයන සිදු කිරීමේදී මතුවන බාධක ඉවත් කිරීමට තැපැල් දෙපාර්තමේන්තුව හා එක්ව කටයුතු කිරීමට ද තීරණය විය. ඩිජිටල් ක්රමවේද භාවිතයෙන් ලිපි ලේඛන සැකසීම කඩිනම් කිරීම සහ අවදානම් ඇගයීමක් මඟින් අඩු අවදානම් අපනයනකරුවන්ට විශේෂ පහසුකම් සැලසීමේ ක්රමවේදයක් ක්රියාත්මක කිරීම පිළිබඳව ද මෙහිදී සාකච්ඡා කෙරිණි.
‘පොහොසත් රටක් – ලස්සන ජීවිතයක්’ යන ජාතික දැක්මට අනුකූලව, 2030 වසර වන විට අමෙරිකානු ඩොලර් බිලියන 36ක අපනයන ආදායම් ඉලක්කය සපුරා ගැනීම සඳහා මෙම ජාතික අපනයන සංවර්ධන සැලැස්ම ක්රියාත්මක කෙරේ. මෙම කටයුතුවල ප්රගතිය සමාලෝචනය කිරීමට සහ අපනයනකරුවන්ගේ ගැටලු නිරාකරණය කිරීම සඳහා රේගුව සහ අපනයන සංවර්ධන මණ්ඩලය ඇතුළු අදාළ ආයතන මාසිකව රැස්වීමට ද මෙහිදී තීරණය විය.
