මෙරට ඩෙංගු ව්යාප්තිය අතිශය අවදානම් සහගත මට්ටමකට පැමිණ ඇති බව ජාතික ඩෙංගු මර්දන ඒකකයේ වැඩබලන අධ්යක්ෂ වෛද්ය කපිල කන්නංගර මහතා අනතුරු අඟවයි. වත්මන් තත්ත්වය අනුව දිනකට අලුතින් වාර්තා වන ඩෙංගු රෝගීන් සංඛ්යාව 600ත් 650ත් අතර ඉහළ අගයක පවතී.
මෙම වසරේ ජනවාරි මාසයේ සිට ජූනි 20 වනදා දක්වා වාර්තා වී ඇති මුළු ඩෙංගු රෝගීන් සංඛ්යාව 46,037ක් වන අතර ජූනි 01 දා සිට මේ දක්වා කාලය තුළ පමණක් රෝගීන් 12,196ක් වාර්තා වී ඇත. මෙය වසරේ මාසයක් තුළ වාර්තා වූ වැඩිම රෝගීන් සංඛ්යාව ලෙස සටහන් වේ. මේ වන විට සිදුව ඇති ඩෙංගු මරණ ගණන 28ක් වන අතර බස්නාහිර පළාතෙන් මුළු රෝගීන් සංඛ්යාවෙන් 51.75%ක් වාර්තා වී තිබේ.
පවතින වැසි සහිත කාලගුණික තත්ත්වය සහ මදුරුවන් බෝවන ස්ථාන පිළිබඳව මහජනතාව දක්වන නොසැලකිලිමත්කම හේතුවෙන් මෙම වසංගත තත්ත්වය තවදුරටත් උග්ර විය හැකි බව සෞඛ්ය අංශ අවධාරණය කරයි. එබැවින් තම නිවස සහ අවට පරිසරය පිරිසිදුව තබා ගැනීම, මදුරු කීටයන් බෝවන ස්ථාන විනාශ කිරීම සහ උණ රෝග ලක්ෂණ ඇත්නම් වහාම වෛද්ය උපදෙස් පැතීම අත්යවශ්ය වේ.
